චීනයේ වරාය රැසක සිරවී ඇති ඔස්ට්‍රේලියාවෙන් ගෙන්වනු ලැබූ ගල්අගුරු මිලදී ගැනීමට ඉන්දියානු කර්මාන්තකරුවන් පිරිසක් ඉදිරිපත්ව සිටින බව වාර්තා වේ.
චීනය මෙතෙක් තමන්ට අවශ්‍ය ගල්අගුරුවලින් වැඩි ප්‍රමාණයක් ආනයනය කළේ ඕස්ට්‍රේලියාවෙන් වන අතර පසුගිය කාලසීමාවේ දෙරට අතර හටගත් මතභේද හේතුවෙන් එය සම්පූර්ණයෙන්ම නවතා දැමීමට කටයුතු කරනු ලැබිණ.
මෙම තීරණය හේතුවෙන් ඒ වනවිට ඕස්ට්‍රේලියාවෙන් ආනයනය කොට චීනයේ වරායවල තිබූ විශාල ගල්අගුරු පවා භාරගැනීම චීනය විසින් ප්‍රති‍ක්ෂේප කළේය.
විදෙස් මාධ්‍ය වාර්තා කරන්නේ එසේ චීනයේ වරායවල සිරවී ඇති ගල්අගුරු තොග මිලදී ගැනීමට සිමෙන්ති සහ යකඩ නිෂ්පාදනය කරන ඉන්දීය කර්මාන්තකරුවන් පිරිසක් ඉදිරිපත්ව සිටින බවයි.
මේ අතර ඉන්දියාවේ මෙම මැදිහත්වීම හේතුවෙන් මේ වනවිට ඕස්ට්‍රේලියාව සහ චීනය අතර පවතින භූදේශපාලනික ප්‍රශ්නය තවදුරටත් සංකීර්ණ විය හැකි බවට විදෙස් නිරීක්ෂකයන් අදහස් පළකොට තිබේ.
