විශේෂ කාර්ය බළකායේ අණදෙන නිලධාරි නියෝජ්‍ය පොලිස්පති ‘වරුණ ජයසුන්දර’ මහතා ඇතුළු විශේෂ කාර්ය බළකායේ නිලධාරීන් 256දෙනෙකු, දින 14ක් නිරෝධායනයට යොමුකර ඇති බව, පොලිස් මාධ්‍ය ප්‍රකාශක කාර්යාලය නිවේදනයක් නිකුත් කරමින් පවසයි.
මහර ‘බන්ධනාගාර ගැටුම’ මැඬපැවැත්වීමට සහභාගී වූ නිලධාරීන් සහ කොළඹ මෙන්ම තදාසන්න ප්‍රදේශවල ‘කොවිඩ්-19 සම්බන්ධ අවදානම් රාජකාරි සඳහා නියුතුව සිටි නිලධාරීන් පිරිසක්, මෙලෙස නිරෝධායන කඳවුරු වෙත යොමුකර ඇති බවත් එම නිවේදනයේ සදහන් වේ.
පවතින කොවිඩ් අවදානම හමුවේ පොලිස් ‘විශේෂ කාර්යය බළකායේ’ අවදානම් රාජකාරි කළ නිලධාරීන්, නිසි නිරෝධායන ක්‍රියාවලියකට ලක්නොකර, ‘සැලසුමකින් තොරව’ රාජකාරි සඳහා අනුයුක්ත කරන බවට පසුගිය දින කිහිපයේම තොරතුරු වාර්තා විය..
ඊට විසඳුමක් වශයෙන්, මෙලෙස නිලධාරීන් නිරෝධායනයට යොමුකර තිබුණ ද, කොළඹ හා තදාසන්න ප්‍රදේශවල රාජකාරි අවශ්‍යතාව සඳහා නිලධාරීන් අනුයුක්ත කිරීමට පියවර ගත් බවත්, විශේෂ කාර්ය බළකායේ දෛනික රාජකාරි කටයුතු ගැටලුවකින් තොරව සිදුවන බවත් වාර්තා වේ.
