2021/2022 කාලසීමාව සඳහා රජයේ වෛද්‍ය නිලධාරීන්ගේ සංගමයේ සභාපතිවරයා ලෙස වෛද්‍ය අනුරුද්ධ පාදෙණිය මහතා නිතරඟයෙන් පත් කිරීම වළක්වාලමින් මොරටුව දිසා අධිකරණය විසින් අතුරු තහනම් නියෝගයක් නිකුත් කර තිබෙනවා.
අදාළ අතුරු තහනම මඟින් රජයේ වෛද්‍ය නිලධාරීන්ගේ සංගමයේ මැතිවරණ කමිටු සභාපතිවරයාට නියෝග කර ඇත්තේ 2021/2022 යන වසර සඳහා විශේෂඥ වෛද්‍ය අනුරුද්ධ පාදෙණිය මහතාව රජයේ වෛද්‍ය නිලධාරීන්ගේ සංගමයේ සභාපතිවරයා ලෙස පත් කිරීම වලක්වන ලෙසයි.
ඒ අනුව දිසා විනිසුරු දමින්ද ආර්. වැලිගොඩපිටිය මහතා නියෝග කර ඇත්තේ නිසි පරිදි නාමයෝජනා කැඳවීමකින් අනතුරුව පවතින මැතිවරණයකින් තේරී පත්වීමකින් මිසක එම සංගමයේ සභාපතිවරයා ලෙස 2021/2022 කාලයට විශේෂඥ වෛද්‍ය අනුරුද්ධ පාදෙනිය මහතාට නිතරඟයෙන් පත්විය නොහැකි බවයි.
එමෙන්ම නියමිත ක්‍රියාවලියෙන් පසුව 2021/2022 කාලසීමාව සඳහා රජයේ වෛද්‍ය නිලධාරීන්ගේ සංගමයට නිලධාරී මණ්ඩලය තෝරා පත් කර ගැනීම සඳහා අලුතින් නාමයෝජනා කැඳවීමට පියවර ගන්නා ලෙසද විනිසුරුවරයා නියෝග කර තිබෙනවා.
වෛද්‍ය පර්යේෂණ ආයතනයේ නියෝජ්‍ය අධ්‍යක්ෂ වෛද්‍ය ජයරුවන් බණ්ඩාර මහතා විසින් 2021/2022 වසර සඳහා GMOA සභාපති ධූරයට තරඟ කිරීමට තමන් ඉදිරිපත් කළ නාමයෝජනා පත්‍ර රජයේ වෛද්‍ය නිලධාරීන්ගේ සංගමයේ මැතිවරණ කමිටුව විසින් වංචනික පදනමක් මත ප්‍රතික්ෂේප කළ බවට චෝදනා කරමින් ගොනු කළ නඩුවකට අදාළව මෙම අතුරු තහනම් නියෝගය නිකුත් කර තිබෙනවා.
