කොළඹ විශ්වවිද්‍යාලයේ නව උපකුලපති ධුරයට මහාචාර්ය එච්. ඩී. කරුණාරත්න පත් කර තිබෙන බව ජනාධිපති මාධ්‍ය ප්‍රකාශක කිංස්ලි රත්නායක මහතා පවසනවා.
ට්විටර් පණිවුඩයක් නිකුත් කරමින් ඒ මහතා සදසහන් කරන්නේ අදාළ පත්වීම අද (12) පස්වරුවේ ජනාධිපති ගෝඨාභය රාජපක්ෂ විසින් සිදුකල බවයි.
කෙසේ වෙතත් මෙම නව ධූරය මෙම වසරේ අප්‍රේල් 12 වැනි දින සිට බලපැවැත්වෙන බවද නිවේදනයේ සදහන්.
මේ වන විට කොළඹ විශ්ව විද්‍යාලයේ උපකුලපති ධූරය මහාචාර්ය චන්ද්‍රිකා එන්. විජේරත්න මහත්මිය හොබවනවා.
ඇය පසුගිය 2019 වසරේ අප්‍රේල් 12 වන දින එම විශ්ව විද්‍යාලයේ 18 වන උපකුලපතිවරිය ලෙස පත්වුණා.
චන්ද්‍රිකා එන්. විජේරත්න මහත්මිය ප්‍රජනක වෛද්‍ය විද්‍යාව පිළිබදව ජ්‍යෙෂ්ඨ මහාචාර්යවරියක්ද වනවා.
කෙසේ වෙතත් පසුගියදා පැවති උපාධි ප්‍රදානෝත්සවයේදී කොළඹ විශ්ව විද්‍යාලයේ වත්මන් කුලපති පූජ්‍ය මුරුත්තෙට්ටුවේ ආනන්ද හිමියන්ට සිසුන් විරෝධය දැක්වීමේ සිදුවීමේදී ඇය එම සිසුන්ට සහය දැක්වූ බවට ආණ්ඩු පක්ෂයේ ඇතැම් පුද්ගලයින්ගෙන් චෝදනා එල්ල වුණා.
