වසංගතවේදය සම්බන්ධයෙන් ස්වදේශික විශේෂඥයන් සිටියත් කොවිඞ් මර්දන ඉහළ කමිටුවලට ඔවුන් කිසිවෙකුත් කැඳවන්නේ නැතැයි ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී මහාචාර්ය තිස්ස විතාරණ මහතා චෝදනා කරයි.
වයිරසවේදය පිළිබඳ ආචාර්ය උපාධිධාරියකු මෙන්ම විෂයට අදාළව දෙස් විදෙස් ආයතන රැසක තනතුරු හෙබවූවකු වන මහාචාර්ය තිස්ස විතාරණ මහතා මේ බව පවසා ඇත්තේ ඬේලි මිරර් පුවත්පතට සම්මුඛ සාකච්ඡාවක් ලබාදෙමිනි.
කොවිඞ් පළමු ව්‍යාප්තියේදී ආරක්ෂක අංශවලට වැඩි වගකීමක් පැවරුණත් දැන් කළයුත්තේ ඔවුන් සෞඛ්‍ය අංශවලට මූලිකත්වය දීම යැයි ද බලවත් අධ්‍යාපනික ක්‍රියාවලියක් මගින් රෝග ව්‍යාප්තිය වැලැක්වීමට කඩිනම් පියවර ගත යුතුව ඇතැයි ද මහාචාර්ය තිස්ස විතාරණ මහතා එහිදී අවධාරණය කර ඇත.
අතීසාරය වසංගතයක් වූ අවස්ථාවේ එය මුලිනුපුටා දැමීමට කටයුතු කෙරුවේ සෞඛ්‍ය අමාත්‍යාංශයෙන් පත්කළ කමිටුවක් මගින් යැයි පවසන හෙතෙම අදාළ දැනුවත්කිරීමේ වැඩපිළිවෙල පාසල් අධ්‍යාපනයට පවා එකතු කළේ යැයි සඳහන් කරයි.
සැක සහිත විදෙස් එන්නත් හා අත්හදා බැලෙන ඖෂධ අඩංගුවලට වඩා අධ්‍යාපන ක්‍රියාවලියක් කෙරෙහි විශ්වාසය තැබිය යුතු යැයි ද ඊට ඉහළ බලධාරින්ගේ අනුමැතිය අවශ්‍යව ඇතැයි ද මහාචාර්යවරයා පවසයි.
