රට තුළ ඉන්ධන අර්බුදයක් නොමැති අවස්ථාවක එවැනි අර්බුදයක් ඇති වූයේ දේශපාලන අවබෝධයක් නොමැති අය සිදුකරන විවිධ ප්‍රකාශ නිසා බව අග්‍රාමාත්‍ය මහින්ද රාජපක්ෂ මහතා පවසනවා.
කුරුණෑගල පැවති උත්සවයකට සහභාගිවෙමින් අග්‍රාමාත්‍යවරයා සදහන් කළේ ඇත්ත වශයෙන්ම මෙරට ඉන්ධන අර්බුදයක් නොතිබූ බවයි.
ඉන්ධන නැව් මෙරට වරායට ළඟා වී තිබුණද ගොඩබෑමේ ප්‍රමාදයක් සිදුවන අවස්ථාවකදී යම් යම් පුද්ගලයින් මෙරට ඉන්ධන සංචිත ඇත්තේ තව දින කිහිපයකට යැයි පැවසීම තුළින් ජනතාව අනවශ්‍ය කළබලයකට පත්වූ බව අග්‍රාමාත්‍යවරයා පෙන්වා දෙනවා.
එවැනි ප්‍රකාශ හේතුවෙන් ඉන්ධන එක්රැස් කරගැනීමට පෝලිම් සෑදුන බවත් ඒවා දේශපාලන පළපුරුද්ද හා අත්දැකීම් නොමැති නිසාවෙන් සිදුවූ දේවල් බවත් වැඩිදුරටත් පවසා සිටියා.
හිටපු බලශක්ති අමාත්‍ය උදය ගම්මන්පිල මහතාට පසුගිය කාලය පුරාවටම ආණ්ඩු පක්ෂයේ මන්ත්‍රීවරුන්ගෙන් එල්ලවූ චෝදනාවද වූයේ මෙරට ඉතිරි ඉන්ධන සංචිත ප්‍රමාණය පිළිබඳව මාධ්‍ය ඉදිරියේ ප්‍රකාශ කිරීමයි.
ඒ තුළින් සාමාන්‍ය ජනතාව අනවශ්‍ය බියක් ඇතිකරගන්නා බවට රජයේ මැති ඇමතිවරුන්ද පවසා සිටියා.
එවන් පසුබිමක අග්‍රාමාත්‍යවරයාද මෙවන් ප්‍රකාශයක් සිදුකිරීම විශේෂත්වයක්.
