ආණ්ඩුවෙන් අමාත්‍යවරුන් දෙදෙනකු ඉවත් කිරීමට සිදුවූයේ කැබිනට්ටුවේ සාමූහික වගකීම පවත්වාගෙන යෑම සියල්ලට වඩා වැදගත් නිසා බවත් මෙම අමාත්‍යවරුන් කැබිනට් තීන්දුවලට එරෙහිව උසාවියේ නඩු පවරද්දීත් ආණ්ඩුව අසීරුවෙන් නිහඬව ඉවසා සිටි නමුත් දිගින් දිගටම ආණ්ඩුවේ සිටිමින් ආණ්ඩුව විවේචනය කිරීම බරපතළ දේශපාලන වරදක් බවත් අග්‍රාමාත්‍ය මහින්ද රාජපක්ෂ මහතා දේශය පුවත්පතට පවසා තිබෙනවා.
“යමකු අමාත්‍ය ධුරයක් දරන විට කතා කළ යුතු සහ නොකළ යුතු දේ දැනගත යුතුයි. එසේම ආණ්ඩුව කරන ජනප්‍රිය දේ තමන්ගේ ගිණුමට දමාගැනීමටත් ජනප්‍රිය නොවන දේ අන් අයගේ ගිණුම්වලට බැර කර ජනප්‍රියවීමට තැත් කිරීමත් අනාගතයක් අපේක්ෂා කරන දේශපාලනඥයන් නොකළ යුතු ක්‍රියාවක්. විශේෂයෙන් විමල් වීරවංශ හා උදය ගම්මන්පිල අමාත්‍යවරුන් මේ ආණ්ඩුව බිහිකිරීමට සෑහෙන කාර්යභාරයක් කළ බව සත්‍යයක්. එදා එසේ ආණ්ඩුව හදන්නට මහන්සි වූ අය ආණ්ඩුව කඩා දැමීමට දායක නොවිය යුතුය යන්න මගේ මතයයි.”
තමන්ගේ දීර්ඝකාලීන දේශපාලන ගමනේදී මෙබඳු බොහෝ රැඩිකල් වැඩවලට දායක වූ නමුත් ඒ සියල්ල කළේ සීමාව දැනගෙන බව පැවසූ අග්‍රාමාත්‍යවරයා මාධ්‍යයට කිවයුතු දේ ගැන නොකිව යුතු දේ ගැන මේ අය තමන්ගෙන් උපදෙස් ලබාගත්තේ නම් මෙවැනි කරදරයක් සිදුනොවන්නේ යැයිද දේශය පුවත්පතට පවසා තිබෙනවා.
එසේම ආණ්ඩුවක් කිසියම් අර්බුදයකට මුහුණදෙන විට එහි හවුල්කාර පක්ෂ හා කණ්ඩායම්වල යුතුකම තමන් සතු විකල්ප යෝජනා ආණ්ඩුවට ලබාදීම බවත් එසේ නොකර මහජන රැස්වීම් තබා ඒවා ගැන ජනතාවට කීම ඵලදායී ක්‍රියාවක් නොවන බවත් අග්‍රාමාත්‍ය මහින්ද රාජපක්ෂ මහතා වැඩිදුරටත් සදහන් කර ඇති බවයි පුවත්පත වාර්තා කරන්නේ.
