දෙදින නිල සංචාරයක් සඳහා ඉන්දියාවට ගොස් සිටින මුදල් අමාත්‍ය බැසිල් රාජපක්ෂ මහතා අද (17) ඉන්දීය මුදල් අමාත්‍ය නිර්මලා සීතාරාමන් මහත්මිය හමුවීමට නියමිතයි.
එමෙන්ම මුදල් අමාත්‍යවරයා අද දිනයේ ඉන්දීය නියෝජ්‍ය ජාතික ආරක්ෂක උපදේශක ශ්‍රී වික්‍රම් මිස්රි මහතා හමුවීමටද කටයුතු යොදා ඇති බව වාර්තාවනවා.
මේ අතර මුදල් අමාත්‍ය බැසිල් රාජපක්ෂ මහතා සහ ඉන්දීය විදේශ අමාත්‍ය එස්.ජයිශංකර් මහතා අතර හමුවක් ඊයේ රාත්‍රියේ පැවැත්වී තිබෙනවා.
සිය ට්විටර් ගිණුමේ පණිවුඩයක් නිකුත් කරමින් ඉන්දීය විදේශ අමාත්‍යවරයා සඳහන් කර ඇත්තේ දෙරටේ ආර්ථික හවුල්කාරිත්වය සම්බන්ධයෙන් මුදල් අමාත්‍ය බැසිල් රාජපක්ෂ මහතා සමග ඵලදායී සාකච්ඡාවක නිරත වූ බවයි.
මෙරට ජනතාවගේ අවශ්‍යතා වෙනුවෙන් අඛණ්ඩව ප්‍රතිචාර දක්වන බවද ඔහු එහි සඳහන් කර තිබෙනවා.
එමෙන්ම මුදල් අමාත්‍ය බැසිල් රාජපක්ෂ මහතා ඊයේ ඉන්දීය අග්‍රාමාත්‍ය නරේන්ද්‍ර මෝදි මහතා සහ විදේශ ලේකම් හර්ශ් වර්ධන් ශ්‍රිංග්ලා ද හමුවුණා.
මෙම සංචාරයේදී ශ්‍රී ලංකාවට අවශ්‍ය තිරිඟු පිටි, සීනි, සහල් සහ අත්‍යවශ්‍ය ඖෂධ මිලදී ගැනීම වෙනුවෙන් ඩොලර් බිලියනයක ණය මුදලක් ලබා ගැනීමට අදාල ගිවිසුමකට අත්සන් තැබීමට නියමිතයි.
