බ්‍රහස්පතින්දා (17) කල්පිටියේ පැවති යතුරුපැදි සවාරියට නාමල් රාජපක්ෂ අමාත්‍යවරයා සහය නොදැක්වූ බව ඔහුගේ මාධ්‍ය අංශය විසින් ට්විටර් පණිවුඩයක් නිකුත් කරමින් කියා සිටිනවා.
කල්පිටියේ පැවැති යතුරුපැදි සවාරිය සඳහා අමාත්‍ය නාමල් රාජපක්ෂ හෝ ඔහුගේ අමාත්‍යංශය විසින් කිසිදු ආධාරයක් ලබා නොදුන් බවත් එය ක්‍රීඩා අමාත්‍යාංශයට සම්බන්ධ නැති පුද්ගලික ආයතනයක් විසින් සංවිධානය කර ඇති බවත් එහි සඳහන් වනවා.
මෙම සවාරිය සැබැවින්ම ජනවාරි මාසයේදී සංවිධානය කළ බවත්, සංවිධානය කරන අවස්ථාවේදී ශ්‍රී ලංකාවේ ඉන්ධන අර්බුදයක් නොතිබූ බවත් අද (18) දින පැවති මාධ්‍ය හමුවකදී ස්පින් රයිඩර්ස් සමාජය කියා සිටියා.
හෝටල් නවාතැන් සඳහා කණ්ඩායම දැනටමත් රුපියල් මිලියන 1.5 ක මුදලක් ගෙවා ඇති බවත්, එබැවින් උත්සවය ප්‍රමාද කළ නොහැකි බවත් එහිදී ස්පින් රයිඩර්ස් සමාජය නියෝජනය කරන සජින සිත්මල් පවසා සිටියා.
“අවුරුදු 10ක් අපි මේ සංචාරය කරන්නේ අලුත් අවුරුද්දේ. සංචාරය අතරතුර අපි සමාජ සුභසාධන ව්‍යාපාරයක නිරත වනවා. මේ වසරේ අපි අපේක්ෂා රෝහලට රුපියල් මිලියන 1.2ක් පරිත්‍යාග කළා වගේම කල්පිටිය ප්‍රදේශයේ පාසල් සිසුන් සඳහා රුපියල් ලක්ෂ 5ක් වටිනා ලිපි ද්‍රව්‍ය පරිත්‍යාග කරනවා,” ඔහු වාර්තාකරුවන්ට පැවසීය.
ස්පින් රයිඩර්ස් ක්‍රීඩා සමාජය පැවසුවේ මෙම සංචාරය ක්‍රීඩා අමාත්‍යවරයාට සම්බන්ධ නොවූ අතර ඊට මෝටර් රථ සහ යතුරුපැදි ලෝලීන්ගේ සහභාගීත්වය ඇති බවයි.
එම සමාජය නියෝජනය කරමින් නිලුපුල් තීක්ෂණ කියා සිටියේ සාමාජිකයින් ද ඉන්ධන ලබාගැනීම සඳහා පිරවුම්හල්වල පෝලිමේ සිටින බවයි.
