වත්මන් ගැටළු විසඳීමට රජයට තවත් කාලය ඇති බව ශ්‍රී ලංකා පොදුජන පෙරමුණු පාර්ලිමේන්තු මන්ත්‍රී ජගත් කුමාර මහතා පවසනවා.
ඒ, අද (31) ශ්‍රී ලංකා පොදුජන පෙරමුණේ ප්‍රධාන කාර්යාලයේ දී පැවති මාධ්‍ය හමුව අමතමින්.
එම කාලය භාවිතයට ගෙන ඉක්මණින් පවතින ප්‍රශ්න විසඳිය යුතුව ඇති බවයි ඔහු පවසන්නේ.
සර්ව පාක්ෂික සමුළුව පැවැත්වීම, ජාත්‍යන්තර මූල්‍ය අරමුදලට යාම, සංචාරක කර්මාන්තය සම්බන්ධයෙන් අවධානය යොමු කිරීම වැනි කාරණ ඔස්සේ පවතින ඩොලර් ප්‍රශ්නය ඇතුළු අර්බුද විසඳා ගැනීමට මුල පුර ඇති බවයි මන්ත්‍රීවරයා පවසන්නේ.
ජනතාවගෙන් ආණ්ඩුවට එල්ල වෙමින් තිබෙන විරෝධය සදාකාලික විරෝධයක් නොවන අතර එම ප්‍රශ්න විසදුණු පසු එම විරෝධයද අවසන් වන අතර පවතින තත්ත්වය අනුව කවුරු බලයට ආවද දවසින් දෙකෙන් මේ ප්‍රශ්න විසඳිය නොහැකි බවත් ඔහු පවසනවා.
මේ මොහොතේ ජාත්‍යන්තර සහය ගත්තද කිසිම ආකාරයක රටේ සම්පත් විකුණන තැනක ආණ්ඩුව නොමැති බවත් එවන් ආණ්ඩුවක් තමන් වැනි අයද නොසිටින බවත් ඔහු වැඩිදුරටත් පවසනවා.
