ජනතා විමුක්ති පෙරමුණේ නායක අනුර කුමාර දිසානායක මහතාගේ ප්‍රධානත්වයෙන් ඊයේ (04) පැවැත්වූ ප්‍රවෘත්ති සාකච්ඡාවකදී හිටපු ජනාධිපති මෛත්‍රිපාල සිරිසේන මහතා හට එල්ල කරන ලද චෝදනා දේශපාලන වාසි තකා පදනම් විරහිතව එල්ලකරන ලද චෝදනා බව පාර්ලිමේන්තු මන්ත්‍රී මෛත්‍රිපාල සිරිසේන මහතා පවසනවා.
නිවේදනයක් නිකුත්කරමින් ඒ මහතා පවසන්නේ තමාට හා තම පවුලේ සාමාජිකයන් හට මහබැංකු බැදුම්කර වංචාවෙන් සොරාගත් මුදලින් යම් කොටසක් බෙදාදුන් බවට දූෂණ විරෝධී හඩ සංවිධානයේ කැඳවුම්කරු වසන්ත සමරසිංහ මහතා කළ චෝදනාව තරයේ පිළිකුලින් යුක්තව හෙළා දකින බවයි.
තමන් මහ බැංකු වංචාවේ දූෂිත ගණුදෙනු හෙළිකර ගැනීමට වෝහාරික විගණනයක් පවා සිදුකිරීමට ශ්‍රේෂ්ඨාධිකරණයේ හිටපු විනිසුරුවරුන්ගෙන් සමන්විත ජනාධිපති කොමිසමක් පවා පත්කළ බව නිවේදනය මගින් සිරිසේන මහතා සිහිපත් කරනවා.
එම ක්‍රියාව දෙස් විදෙස් ගෞරවයට පවා පාත්‍රවූ බවයි ඒ මහතා සදහන් කරන්නේ.
මෙම ව්‍යාජ චෝදනා සම්බන්ධයෙන් ගත හැකි සියලු ක්‍රියාමාර්ග ගන්නා බවද නිවේදනයේ සදහන්.
