කොළඹ නාගරික ජනතාව, සෞඛ්‍ය සහ ආරක්ෂක අංශ සාමාජිකයන්, වැඩිහිටියන් සඳහා එන්නත මුලින්ම ලබාදෙන බව ජනාධිපති උපදේශක ලලිත් වීරතුංග අරුණ පුවත්පත වෙත කියා ඇත.
ලෝක සෞඛ්‍ය සංවිධානයේ මැදිහත්වීමෙන් එන්නත ලබාදෙන ආසියානු කලාපයේ රටවල් දෙක අතරින් ශ්‍රී ලංකාව එක් රටක් බව ඔහු කියා ඇත.
කොවිඩ් එන්නත් ලබාගැනීම සඳහා සය පුද්ගල ජනාධිපති කාර්යසාධක බලකායක් ස්ථාපිත කර 2021 වසරේ මාර්තුවේදී අවදානම් කණ්ඩායම්වලට එන්නත කඩිනමින් ලබාදෙන බව ඔහු කියා තිබේ.
කොවිඩ් එන්නත ලබාගැනීමට අදාල සම්බන්ධීකරණ කටයුතු ලලිත් වීරතුංග කරමින් සිටී. එන්නත් ලබාගැනීම පිළිබඳ ලෝක සෞඛ්‍ය සංවිධානයේ කොළඹ කාර්යාලයේ ප්‍රධානී වෛද්‍ය රාසියා පෙන්සෙ සමඟ දෙසැම්බර් 27 වැනිදා සාකච්ඡාවක් පවත්වා තිබුණි.
එංගලන්තයේ නිෂ්පාදිත ඔක්ස්ෆර්ඩ් ඇස්ට්‍රාසෙනෙකා එන්නතේ ඒකක මිලියන 300ක් පමණ ඉන්දියාවේ නිෂ්පාදනය කිරීමට සූදානම්ය. එම එන්නත ලංකාවට ගෙන්වීමට නියමිතය. ශ්‍රී ලංකාවේ ජනගහනයෙන් සීයට 20ක් සඳහා එම එන්නත ලබාදීමට ලෝක සෞඛ්‍ය සංවිධානය මැදිහත් වෙයි.
