බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් හට පහරදීමේ සිද්ධිය සම්බන්ධයෙන් අත්අඩංගුවට ගත් සැකකරුවන් දෙදෙනෙකු හෙට (12) දක්වා රක්ෂිත බන්ධනාගාරගත කිරීමට අධිකරණය අද නියෝග කරනු ලැබුවා.
එම සැකකරුවන් කොළඹ මහේස්ත්‍රාත් අධිකරණයට අද ඉදිරිපත් කරනු ලැබූ අතර එහිදී කොළඹ අතිරේක මහේස්ත්‍රාත් ශිලනි පෙරේරා මහත්මිය විසින් මෙම නියෝගය නිකුත් කළා.
එහිදී අධිකරණය වැඩිදුරටත් නියෝග කර ඇත්තේ එම සැකකරුවන් හෙට දිනයේ හඳුනාගැනීමේ පෙරෙට්ටුවක් සඳහා යොමු කරන ලෙසටයි.
කොල්ලුපිටිය පොලීසිය විසින් අත්අඩංගුවට ගනු ලැබූ සැකකරුවන් දෙදෙනා සම්පූර්ණයෙන්ම ආවරණය කර අධිකරණය වෙත ඉදිරිපත් කර තිබුණා.
මේ අතර සිද්ධිය සම්බන්ධයෙන් අත්අඩංගුවට ගනු ලැබූ තවත් සැකකරුවෙකු අසනීප තත්ත්වයක් හේතුවෙන් කොළඹ ජාතික රෝහල වෙත ඇතුලත් කර තිබෙනවා.
මහේස්ත්‍රාත්වරිය සඳහන් කර ඇත්තේ එම සැකකරු නිරීක්ෂණය කිරීමෙන් පසුව ඔහු සම්බන්ධයෙන් සුදුසු නියෝග නිකුත් කරන බවයි.
