මේ වන විට සමාජ මාධ්‍ය තුළ කැළඹීමකටත් දැඩි සංවේගයක් ඇති කිරීමටත් හේතුවී තිබෙන ඡායාරූප කිහිපයක් පිළිබදව News19 සොයාබැලීමක් කළා.
අදාළ ඡායාරූපවල දැක්වුණේ මෙවර සාමාන්‍ය පෙළ විභාගය ප්‍රශ්න පත්‍රවලට උත්තර ලියමින් සිටින දරුවන් පවත්නා මහවැස්සට හසුවී කුඩ ඉහළාගෙන විභාගයට මුහුණ දෙන ආකාරයයි.
දැඩි කම්පනයක් ඇතිකරන මෙම සිදුවීම සිදුවී ඇත්තේ බස්නාහිර පළාතේ ගම්පහ අධ්‍යාපන කොට්ඨාශයේ ගම්පහ තක්ෂිලා විද්‍යාලයේ බව News19 වෙත වාර්තා වුණා.
දරුවන් රැසක් ඉගෙනගන්නා මෙම පාසලේ සිදුවීමට අදාළ මෙම ගොඩනැගිල්ල 1996 වසරේ ඉදිකිරීම් ආරම්භ කර 1998 වසරේ ඉදිකිරීම් අවසන් කර තිබෙනවා.
ඒ අනුව මේ වන විට වසර 24 ක් පැරණි මෙම ගොඩනැගිල්ලේ වහලය මේ වන තෙක් කිසිදු අවස්ථාවක අලුත්වැඩියා කර නැහැ.
පාසල පැවැත්වෙන දිනවලදීද වැසි දිනයන්හී මෙම ගොඩනැගිල්ලේ ඉහළ මහලයේ සිටින දරුවන් තෙමෙමින් අකුරු කරන බව පාසලේ දෙමාපියන් පවසනවා.
එවන් තත්ත්වයක් තිබියදීත් මෙම ගොඩනැගිල්ලේ අධ්‍යයන පොදු සහතික පත්‍ර සාමාන්‍ය පෙළ විභාගය පැවැත්වීමට අවසර දුන් පාසල් බලධාරියා කවුරුන්දැයි සෙවිය යුතු වනවා.
