ගාල්ල ජාත්‍යාන්තර ක්‍රිකට් ක්‍රීඩාංගනයේදී ශ්‍රී ලංකාව හා ඔස්ට්‍රේලියාව අතර පැවැත්වෙන පළමු ටෙස්ට් තරඟය අතරතුර ගාලු කොටු පවුර මත සිට ඊයේ (30) විරෝධතාකරුවන් පිරිසක් ජනාධිපති ගෝඨාභය රාජපක්ෂට එරෙහිව විරෝධතාවයක් පැවැත්වූවාත
මෙම ස්ථානයට පැමිණි යුද හමුදා සෙබලුන් පිරිසක් ඔවුන්ව විසුරුවා හැරීමට කටයුතු කිරීමේදී විරෝධතාකරුවන් ඊට විරෝධය පෑවා.
ඔවුන් ප්‍රශ්න කර සිටියේ සිවිල් විරෝධතාවයක් විසුරුවා හැරීමට පොලීසිය මැදිහත් නොවී යුද හමුදාව ආයුධද අතැතිව පැමිණෙන්නේ කෙසේද යන්නයි.
කෙසේවෙතත් යුද හමුදා මාධ්‍ය ප්‍රකාශක බ්‍රිගේඩියර් නිලන්ත ප්‍රේමරත්න මහතා ‘ද මෝර්නින් ‘ පුවත්පතට අදහස් දක්වමින් පවසා ඇත්තේ ඊයේ දිනයේදී ගාලු කොටු බැම්ම උඩ පැවති විරෝධතාව විසුරුවා හැරීම සදහා හමුදාව මැදිහත් වූවේ, එම විරෝධතාවය හේතුවෙන්, පිතිකරණයේ නිරතව සිටි පිතිකරුවන්ට එය බාධාවක් වූ නිසා බවයි.
විරෝධතාකරුවන් විරෝධතාපුවරු ඔසවාගෙන සිටි බවත්, එම විරෝධතා පුවරු නිසා පිතිකරුවන්ගේ අවධානය වෙනතකට යොමු වීමේ අවධානමක් තිබුණු බවත් හමුදා මාධ්‍ය ප්‍රකාශකවරයා පවසා තිබෙනවා.
මේ හේතුවෙන් විරෝධතාකරුවන් ඉවත් නොකර, විරෝධතා පුවරු පමණක් ඉවත් කිරීමට කටයුතු කළ බව ඔහු සදහන් කළ බව ‘ද මෝර්නින් ‘ පුවත්පත පවසනවා.
