තවත් දින 10 – 12 ක් තුළ රටේ ඉන්ධන ප්‍රශ්නය සහ ගෑස් ප්‍රශ්නය විසඳන්නේ යැයි ජනාධිපති ගෝඨාභය රාජපක්ෂ මහතා පොරොන්දුවක් ලබාදුන් බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ලලිත් එල්ලාවල පවසනවා.
ඒ, ශ්‍රී ලංකා පොදුජන පෙරමුණේ මන්ත්‍රීවරුන් 10 දෙනෙකුගේ කණ්ඩායමක් ඊයේ (02) ජනාධිපතිවරයා හමුවී සාකච්ඡා කිරීමෙන් අනතුරුව මාධ්‍ය වෙත අදහස් පළ කරමින්.
මෙහිදී වැඩිදුරටත් අදහස් දැක්වූ ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ලලිත් එල්ලාවල,
“ජනාධිපතිතුමාට අපි අද රටේ තියෙන තත්වය පැහැදිලි කරලා දුන්නා. අද රටේ ජනතාවට ජීවත් වෙන්න විදියක් නෑ, මේ ප්‍රශ්න සියල්ලම ජනාධිපතිතුමාට තේරුම් කරලා දීලා මේකෙ ඉදිරි වැඩපිළිවෙල මොකක්ද කියලා අපි ජනාධිපතිතුමාගෙන් ඇහුවා. ජනාධිපතිතුමා ඒ අනුව ඉදිරි වැඩපිළිවෙල කිව්වා. එතුමා පොරොන්දුවක් දුන්නා තව දවස් 10ක් 12ක් විතර යනකොට මේ තෙල් ප්‍රශ්නෙයි ගෑස් ප්‍රශනෙයි විසඳන්න පුළුවන් කියලා. ඒ හින්දා අපි ඉවසීමෙන් ඒ දවස් 10 – 12 ත් බලාගෙන ඉමු”
