ETI සහ ස්වර්ණමහල් ආයතනවල හිටපු අධ්‍යක්ෂවරුන් වන ජීවක එඳිරිසිංහ, දීපා එදිරිසිංහ සහ අසංක එදිරිසිංහ යන අය අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබෙනවා.
ඒ රුපියල් බිලියන 13.7ක මුදලක් තැන්පතු ලෙස නීතිවිරෝධීව ලබා ගැනීම සහ මුදල් විශුද්ධිකරණ චෝදනාව යටතේ ඔවුන් අත්අඩංගුවට ගෙන අධිකරණයට ඉදිරිපත් කරන්නැයි නීතිපති දප්පුල ද ලිවේරා මහතා අපරාධ පරීක්ෂණ දෙපාර්තමේන්තුවට අද (05) පස්වරුවේ ලබාදුන් උපදෙස්වලට අනුවයි.
අත්අඩංගුවට පත් දීපා අංජලී එදිරිසිංහ මහත්මිය කොළඹ නගර සභාවේ ශ්‍රී ලංකා නිදහස් පක්ෂයේ නාගරික මන්ත්‍රීවරියක්ද වනවා.
එදිරිසිංහ ව්‍යාපාරය කලෙක මෙරට තිබූ දැවැන්ත ව්‍යාපාර ජාලයක් වූ අතර එහි සභාපතිනී සෝමා එදිරිසිංහ මහත්මියගේ අභාවයෙන් පසුව එම ව්‍යාපාර දිනෙන් දින අභාවයට යනු ලැබූවා.
ඇයගේ දරුවන් වන ජීවක එදිරිසිංහ, නාලක එදිරිසිංහ, අසංක එදිරිසිංහ හා දීපා එදිරිසිංහ හට එම ව්‍යාපාර පවත්වාගෙන යා නොහැකිවූ අතර ඔවුන් සතුව තිබූ රූපවාහිනී නාළිකාව වන ස්වර්ණවාහිනී සහ රේඩියෝ නාලිකා කිහිපයක්ද විකුණා දැමීමට සිදුවුණා.
ETI සමාගම හරහා තැන්පතුකරුවන්ගේ රුපියල් බිලියන ගණනක මුදල් වංචා කර තිබූ අතර මේ හේතුවෙන් ඔවුන්ට විදෙස් ගමන් තහනමක්ද පනවා තිබුණා.
කෙසේ වෙතත් ETI සමාගමේ තවත් අධ්‍යක්ෂවරයෙක් වන නාලක එදිරිසිංහ මහතා මෙතෙක් අත්අඩංගුවට ගෙන නැහැ.
