මේ වනතුරුත් ජනාධිපතිවරයා ඉල්ලා අස් වී නැති බව ජාතික ජන බලවේගයේ නායක අනුර කුමාර දිසානායක පවසනවා
මේ ගත කරන්නේ ඉතිහාසයේ බිහිසුනුම පැය කීපය බවත් සියලුම දේශපාලන පක්ෂ සහ ජනතාව වගකීම් සහගතව කටයුතු කළ යුතු මොහොත එළඹී ඇති බවත් ඔහු විශේෂ ප්‍රකාශයක් කරමින් දන්වා සිටිනවා.
වාර්තා වන ආකාරයට ජනාධිපතිවරයාගේ බලය අගමැති රනිල් වික්‍රමසිංහ විසින් පවරාගෙන අතිශය මර්ධනකාරී පිළිවෙතකින් රට පාලනය කිරීමට සැරසෙන බවයි ඔහු පෙන්වා දෙන්නේ.
“රට බිහිසුණු ඛේදවාචයක් අභියස ඉන්නවා. දැන් සවස් භාගය එළඹෙමින් තිබුණත් තවමත් ජනාධිපතිවරයා ඉල්ලා අස් වී නැහැ. ඒ වෙනුවෙන් ජනාධිපති ධුරයේ වැඩ බැලීම සඳහා රනිල් වික්‍රමසිංහ අගමැතිවරයා පත් කළ බවට තමයි වාර්තා වෙමින් තිබෙන්නේ. රනිල් වික්‍රමසිංහ උත්සාහ කරමින් සිටින්නේ තමන් වෙත පවරා ගත් බලය මර්ධන කාරී ලෙස යොදා ගන්න. ඒ අනුව තමයි මේ වනවිට බස්නාහිර පළාතේ ඇඳිරි නිතිය ක්‍රියාත්මකකර තිබෙන්නේ.
රට පුරාම හදිසි නිතිය ප්‍රකාශයට පත් කරලා තියනවා. .ත්‍රස්තවාදය වැලැක්වීමේ පනත බලාත්මක කිරීම සඳහා කටයුතු කරමින් ඉන්නවා. මේ සිදුවීම් වලින් පෙන්වන්නේ රනිල් වික්‍රමසිංහ හෝ පාලක කණ්ඩායම මේ ප්‍රශ්නය සාමකාමීව ප්‍රජාතන්ත්‍රවාදීව ජනතාවගේ හඬට ඇහුම්කන් දෙමින් විසඳනවා වෙනුවට ව්‍යවස්ථාව ඇතුළෙ තමාට පවරා ගන්නා ලද නීතිමය රෙගුලාසි අතරෙ රට ඛේදවාචයක් දක්වා තල්ලු කරමින් යන බවයි.
මේ අවස්ථාවේ දී රනිල් වික්‍රමසිංහ හෝ තීන්දු ගන්නා කණ්ඩායම් කල්පනා කරනවා නම් යම් මර්ධනකාරී පිළිවෙතකින් කටයුතු කරන්න එය අනිවාර්ය ලෙස ඉවර වෙන්නෙ භයානක ඛේදවාචයකියින්. අපි බලකරලා කියනවා ජනතාවගේ හඬට අභිලාෂයන්ට අරමුණුවලට ඇහුම්කන් දෙන්න. එහෙම නැතිව තනි පුද්ගලයෙකුගේ කෑදර බල උවමනාව වෙනුවෙන් අපේ රටත් ජනතාවත් බිලි දිය යුතු නෑ. “
