ආසියානු ශූරතා හිමිකරගත් ශ්‍රී ලංකා ක්‍රිකට් කණ්ඩායම අද (13) දිවයිනට පැමිණියා.
ඔවුන් පිළිගැනීම සඳහා විශේෂ උත්සවයක් කටුනායක ජාත්‍යන්තර ගුවන්තොටුපොළේ සංවිධානය කර තිබූ අතර ඔවුන් රථ පෙළපාලියකින් කටුනායක ගුවන්තොටුපොළේ සිට කොළඹ වෙත කැඳවාගෙන එන ලදි.
ආසියාව දිනා මව්බිමට පැමිණි ඔවුන්ට කටුනායක සිට කොළඹට පැමිණෙන තෙක්ම මඟ දෙපස රැස්ව සිටි ජනතාවගෙන් හිමිවූයේ උණුසුම් පිළිගැනීමක්. අනතුරුව ශ්‍රී ලංකා ක්‍රිකට් කණ්ඩායම ශ්‍රී ලංකා ක්‍රිකට් ආයතනය වෙත පැමිණි අතර ක්‍රිකට්ලෝලීන් විශාල පිරිසක් එහිදී ද රැස්වී කණ්ඩායමට සුබපැතුම් එකතු කර තිබුණි. ක්‍රිකට් කණ්ඩායමේ සාමාජිකයන් ක්‍රිකට් ආයතනයෙන් පිටව යන අවස්ථාවේදී ද ක්‍රීඩා ලෝලීන්ගෙන් ඔවුන්ට මහත් හරසර හිමිවුණි.
කෙසේ නමුත්, ශ්‍රී ලංකා කණ්ඩායමේ නායක දසුන් ශානක සමග මෙහිදී ඡායාරූපයක් ගැනීමට උත්සහා කළ තරුණියක් බිම ඇදී වැටී තිබුණි. එහිදී සිය රථය නවතා ගත් දසුන් ඇය ගැන විමසා තිබූ අතර වාසනාවකට අනතුරෙන් ඇයට කිසිදු තුවාලයක් සිදුවී නොතිබුණි.
පසුව දසුන් ඇය සමග ඡායාරූපයකට පෙනී සිටින ලදි.
