වප් පොහොය දිනයේ සියලු ආගමික ස්ථාන අදුරේ තැබීමට ගත් තීරණය අත්හිටවූ බව පූජ්‍ය ආචාර්ය ඕමල්පේ සෝභිත හිමියන් ඊයේ දින නිවේදනය කරනු ලැබුවා.
ඒ, විදුලි බිල අඩු කරන බවට මහජන උපයෝගිතා කොමිසමේ සභාපති ජනක රත්නායක විසින් ඊයේ මල්වතු සහ අස්ගිරි මහ නා හිමිවරුන් වෙත දැනුවත් කිරීම හේතුවෙන්.
කෙසේ නමුත් මේ සම්බන්ධයෙන් අදහස් දක්වමින් කාදිනල් හිමිපාණන්ගේ මාධ්‍ය ප්‍රකාශක සිරිල් ගාමිණී පියතුමන් සදහන් කළේ ආගමික ස්ථාන සදහා ලබාදුන් මෙම සහනය ඉදිරියේදී ජනතාව වෙතත් ලබා දීමට කටයුතු කළ යුතු බවයි.
අත්‍යාවශ්‍ය ආහාර මිල පවා ඉහළ ගොස් ඇති පසුබිමක ඉහළ ගිය ව්දුලි බිල රටේ සියලුම ජනතාවට දරා ගැනීමට නොහැකි බවත් ජීව්ත් වීමට නොහැකි ආර්ථික තත්වයක් රට තුල නිර්මාණය වී ඇති බවත් සිරිල් ගාමිණී පියතුමන් පෙන්වා දෙනවා.
“ආගමික ස්ථාන වලට විතරක් නෙවෙයි ප්‍රශ්න තියෙන්නේ. විදුලි බිලේ මේ විශාල වෑඩිවීම මිනිස්සුන්ට දරාගන්න පුළුවන් දෙයක් නෙවෙයි. මේවට හේතු වුණු පුද්ගලයන් නිදැල්ලෙ ඉද්දි ආර්තිකයේ කඩා වැටීම ජනතාවගේ කරපිට පැටවීම ලොකු අසාධාරණයක්”.
මේ අතර, ආගමික ස්ථානවල විදුලිබිල අඩු කිරීමට තීරණය කළේ ආගමික නායකයින් කළ ඉල්ලීම නිසා පමණක් නොවන බව මහජන උපයෝගිතා කොමිෂන් සභාව පවසනවා.
එහි සභාපති ජනක රත්නායක මාධ්‍ය හමුවකට එක්වෙමින් සදහන් කළේ ඊයේ දිනයේ සිදු කිරීමට නියමිතව තිබූ ආගමික ස්ථාන අදුරේ තැබීමේ විරෝධතාවද විදුලිබිල අඩු කිරීමේ තීරණයට බලපෑ බවයි.
