ඔක්තෝබර් 09 දින සාමකාමී විරෝධතාකරුවන්ට පහරදීමට සම්බන්ධ පොලිස් නිලධාරීන්ගේ ඡායාරූප සමාජ මාධ්‍යයන්හී පළ කිරීම සම්බන්ධයෙන් ප්‍රශ්න කිරීම සඳහා තරුණ ජනමාධ්‍යවේදීන්ගේ සංගමයේ සභාපති තරිඳු ජයවර්ධන මහතා අද උදෑසන 9.30 ට අපරාධ පරීක්ෂණ දෙපාර්තමේන්තුවට කැඳවා තිබෙනවා.
මීට පෙර අදාළ කරුණ සම්බන්ධයෙන් විමසීම සඳහා මාධ්‍යවේදී තරිදු උඩුවරගෙදර මහතාවද අපරාධ පරීක්ෂණ දෙපාර්තමේන්තුවට කැඳවා තිබුණා.
මේ අතර මාධ්‍යවේදී තරිදු ජයවර්ධන මහතාට කොටුව පොලිස් ස්ථානාධිපතිවරයා අතින් ඇඳ පහරදීමට උත්සහ කිරීමේ සිදුවීමට අදාළව පොලිස් මූලස්ථානයට සිදුකළ පැමිණිල්ල සම්බන්ධයෙන් මේ වන තෙක් කිසිදු ක්‍රියාමාර්ගයක් ගෙන නොමැති බව ඔහු පවසනවා.
ජයවර්ධන මහතා වැඩිදුරටත් පෙන්වා දෙන්නේ මාධ්‍යවේදීන්ට සිදුවන හිරිහැර හා බාධාකිරීම් සම්බන්ධයෙන් කඩිනමින් නීතිය ක්‍රියාත්මක නොවන පරිසරයක් මේ වන විට ශ්‍රී ලංකාව තුළ ඇතිවී ඇති බවයි.
