නුදුරු අනාගතයේ දී ඉන්දීය අධිකරණය සම්පූර්ණයෙන්ම කඩදාසිවලින් තොර වනු ඇතැයි එරට නීති හා අධිකරණ අමාත්‍ය කිරන් රිජිජු පවසයි.
දිල්ලි මහාධිකරණ නව ගොඩනැගිල්ල විවෘත කිරීමේ අවස්ථාවට එක්වෙමින් අමාත්‍යවරයා පැවසුවේ, තමන් ඊ-උසාවි ව්‍යාපෘති ගැන සවිස්තරාත්මක රැස්වීමක් පැවැත්වූ බවයි.
ඊ-උසාවි සඳහා ඉන්දියාවේ අගවිනිසුරු වරයා ප්‍රමුඛ අධිකරණය කටයුතු කරමින් ඇති බව ද ඔහු එහිදී පැවසීය.
සම්පූර්ණයෙන්ම ඩිජිටල්කරණය වූ අධිකරණය යුක්තිය පසිඳලීමේ යාන්ත්‍රණයටම විශාල බලපෑමක් ඇති කරනු ඇති බවත් විශේෂයෙන් එය ඉක්මන් ප්‍රතිඵල ලබාදීමට ද උපකාරී වනු ඇති බවත් ඇමතිවරයා මෙහිදී පෙන්වා දුන්නේය.
අධිකරණය වඩාත් සිත්ගන්නාසුළු හා ආකර්ශනීය කළ යුතු බවත් එවිට අගතියට පත් පුද්ගලයින්ට පහසුවෙන් අධිකරණයට පැමිණීමට හැකි වනු ඇති බවත් ඔහු එහිදී පවසා තිබේ.
