සමාජ ක්‍රියාකාරිකයෙකු වන අනුරුද්ධ බණ්ඩාර අත්අඩංගුවට ගැනීම සම්බන්ධයෙන් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් ඇතුළු පොලිස් නිලධාරීන් 11 දෙනෙකුට එරෙහිව කටයුතු කිරීමට ශ්‍රේෂ්ඨාධිකරණය අද (31) අවසර ලබා දුන්නා.
ඒ අත්තනෝමතික ලෙස අත්අඩංගුවට ගැනීමෙන් නිදහස, අදහස් ප්‍රකාශ කිරීමේ නිදහස සහ නීතිය ඉදිරියේ සමානාත්මතාවයේ අයිතිය උල්ලංඝනය කිරීම යන කරුණු සම්බන්ධයෙන් ශ්‍රේෂ්ඨාධිකරණය ඉදිරියේ පවරා තිබූ නඩුවට අදාළවයි.
මෙහිදී පෙත්සම්කරු වෙනුවෙන් ජනාධිපති නීතිඥ සාලිය පීරිස්, තනුක නන්දසිරි සහ මනුජය ද සිල්වා පෙනී සිටි අතර නීතිපති වෙනුවෙන් අතිරේක සොලිසිටර් ජනරාල් කනිෂ්ක බාලපටබැඳි මහතා පෙනී සිටියා.
තිසර අනුරුද්ධ බණ්ඩාර 2022 වසරේ අප්‍රේල් මස 02 වන දින රාත්‍රියේ මෝදර පොලීසියේ යැයි කියාගත් සිවිල් ඇඳුමින් සැරසුණු කණ්ඩායමක් පැමිණ රැගෙන ගොස් තිබුණා.
කෙසේ වෙතත් පසුව මෝදර පොලීසියෙන් කළ විමසීමේදී එම පොලිස් ස්ථානය පවසා තිබුණේ එවන් තරුණයෙක් මෝදර පොලීසියට රැගෙන නොපැමිණී බවයි.
කෙසේ නමුත්, පසුව, අතුරුදන්ව සිටි තිසර අනුරුද්ධ බණ්ඩාර මෝදර කොට්ඨාශ අපරාධ විමර්ශන ඒකකයේ රඳවාගෙන සිටින බවට පොලීසියෙන් ශ්‍රී ලංකා මානව හිමිකම් කොමිෂන් සභාව දැනුවත් කර තිබුණා.
ඉන් පසුව, ඔහුව අධිකරණය හමුවට ගෙන ඒමෙන් අනතුරුව ඇප මත නිදහස් කරන ලෙස අධිකරණය නියෝග කළා.
තිසර අනුරුද්ධ බණ්ඩාර අප්‍රේල් 03 විරෝධතාවය සංවිධානය කරන පුද්ගලයන්ගෙන් එක් අයෙක් වන අතර GoHomeGota2022 ෆේස්බුක් කණ්ඩායමේ ඇඩ්මින්වරයෙක් ලෙසද ක්‍රියාකළා.
