වීඩියෝ පටයක් සහ හඬ පටයක් ප්‍රසිද්ධ කරන බවට තර්ජනය කරමින් මිහින්තලය රජමහා විහාරාධිපති පූජ්‍ය වළවාහැංගුණුවැවේ ධම්මරතන හිමියන්ගෙන් රුපියල් කෝටියක මුදලක් කප්පම් ඉල්ලීමේ සිද්ධිය සම්බන්ධයෙන් විධිමත් විමර්ශනයක් සිදුකර එහි ප්‍රගතිය දන්වන්නැයි අනුරාධපුර ප්‍රධාන මහේස්ත්‍රාත්වරයා මිහින්තලේ පොලිසියට නියෝග කර තිබෙනවා.
අනුරාධපුර ප්‍රධාන මහේස්ත්‍රාත්වරයා විසින් අදාළ දුරකථන සමාගමේ කළමනාකාරීත්වයට නියෝග කර ඇත්තේ මෙම කප්පම් ඉල්ලීමේ සිද්ධියට යොදාගෙන ඇති දුරකථන අංකය පිළිබඳව විශ්ලේෂණ වාර්තාවක් ද මිහින්තලේ පොලිසියට ලබාදෙන ලෙසයි.
අදාළ කප්පම් මුදල ඉල්ලා පසුගිය 06 වනදා වට්ස්ඇප් යෙදුම හරහා පුද්ගලයෙක් විසින් නායක හිමියන් වෙත දුරකතන ඇමතුමක් ලබාගෙන ඇති බව උන්වහන්සේ පොලීසිය වෙත පැමිණිල්ලක් ඉදිරිපත් කර තිබුණා.
උන්වහන්සේ පොලීසියට ප්‍රකාශ කර තිබුණේ මිහින්තලය ප්‍රදේශයේ ව්‍යාපාරිකයෙකු එම වීඩියෝ පටය සහ හඬ පටය ඔහුගේ මුහුණ පොතේ පළ කර තිබූ බවත් මේ වන විට එය ඉවත් කර ඇති බවත්ය.
