ඉකුත් වසරේ මැයි මස 9 වන දා ගාලු මුවදොර ගෝඨා ගෝ ගම අරගලයට පහරදීමේ සිද්ධියට අදාළව සැකකරුවකු ලෙස දේශබන්දු තෙන්නකෝන් මහතා නම් කරන ලෙස නීතිපතිවරයා විසින් නිකුත් කර ලිපියක් ද බල රහිත කරමින් අභියාචනාධිකරණය විසින් තවත් රිට් ආඥාවක් නිකුත් කළා.
නීතිපතිවරයා විසින් නිකුත් කළ ලිපිය බලරහිත කරන ලෙස ඉල්ලා දේශබන්දු තෙන්නකෝන් මහතා විසින් ගොනුකළ පෙත්සමේ තීන්දුව දෙමින් අභියාචනාධිකරණ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන මහත්වරුන්ගෙන් සමන්විත විනිසුරු මඩුල්ල විසින් මෙම නියෝගය නිකුත් කරනු ලැබුවා.
තීන්දුව ප්‍රකාශයට පත් කරමින් අභියාචනාධිකරණයේ සභාපති විනිසුරුවරයා සඳහන් කළේ ඉකුත් මැයි මස 09 වනදා ගාලුමුවදොර අරගලයට පහරදීමේ සිද්ධියට මෙම පෙත්සම්කරු ආධාර අනුබල දුන් බවට ප්‍රමාණවත් සාක්ෂි අනාවරණය වී නොමැති බවයි.
ඒ අනුව පෙත්සම්කරුට එරෙහිව දණ්ඩ නිති සංග්‍රහයේ 314, 316 සහ 343 යන වගන්ති යටතේ චෝදනා ඉදිරිපත් කිරීමට හැකියාවක් නොමැති බව සඳහන් කළ අභියාචනාධිකරණ විනිසුරු මඩුල්ල එසේ චෝදනා ඉදිරිපත් කිරීමෙන් ඔහුට අයුක්තියක් සහ අසාධාරණයක් සිදුවන බව ද පැවසුවා.
ඒ අනුව පෙත්සම්කරු සැකකරු වශයෙන් නම්කරන ලෙස දන්වමින් නීතිපතිවරයා විසින් ඉකුත් අප්‍රේල් මස මස 19 වනදා අපරාධ පරීක්ෂණ දෙපාර්තමේන්තුව වෙත යැවූ ලිපිය තුළින් පෙත්සම්කරුට පිරිමැසිය නොහැකි හානියක් සිදුවී ඇති බවත් එය නීතිපතිවරයා තමන්ට පැවරී තිබෙන බලය අභිබවා ගොස් කටයුතු කිරීමක් බවත් අභියාචනාධිකරණයේ සභාපති විනිසුරුවරයා පෙන්වා දුන්නා.
ඒ අනුව පෙත්සම්කරු සැකකරු වශයෙන් නම් කරන ලෙස දන්වමින් නීතිපතිවරයා විසින් නිකුත් කළ ලිපිය ද බල රහිත කිරීමේ රිට් ආඥාවක් නිකුත් කළ අභියාචනාධිකරණය ඔහු අදාළ සිද්ධියේ තවදුරටත් සැකකරුවකු නොවන බව කොළඹ කොටුව මහේස්ත්‍රාත් අධිකරණයට දැනුම් දෙන ලෙසත් අපරාධ පරීක්ෂණ දෙපාර්තමේන්තුවේ අධ්‍යක්ෂ වරයාට නියෝග කළා.
එම සිද්ධිය සම්බන්ධයෙන් පෙත්සම්කාර දේශබන්දු තෙන්නකෝන් අත්අඩංගුවට ගැනීම වළක්වමින් අභියාචනාධිකරණය විසින් අපරාධ පරීක්ෂණ දෙපාර්තමේන්තුව විතර තවත් රිට් ආඥාවක් ද නිකුත් කරනු ලැබුවා.
