මැල්සිරිපුර පොලීසියෙන් තමන්ට අසාධාරණයක් සිදුවු බවට චෝදනා කරමින් පුද්ගලයෙකු කුරුණෑගල අධිකරණ සංකීර්ණයේ වහලය මත නැගී විරෝධතාවක නිරත වූ බවට වාර්තා වෙනවා.
අධිකරණ සංකීර්ණයේ විරෝධතාවක නිරතව සිටි අදාළ පුද්ගලයා පසුව අධිකරණයෙහි වහලය මත නැගී විරෝධතාවයේ නිරත වූ බවයි සඳහන් වන්නේ.
මෙම පුද්ගලයා පවසන්නේ නීතිවිරෝධී මත්පැන් ජාවාරමක් සම්බන්ධයෙන් තමන්ට මැල්සිරිපුර පොලීසිය විසින් නීති විරෝධීව නඩුවක් ගොනුකර ඇති බවයි.
තමන් අදාළ චෝදනාවට වරදකරුවෙකු නොවන බවත් එවැනි චෝදනාවක් තමන්ට එල්ල කිරීම අසාධාරණ බවත් ඔහු පවසා තිබෙනවා.
55 හැවිරිදි පුද්ගලයෙකු මෙලෙස අධිකරණය මත වහලය මත නැග ඇති අතර ඔහු වහලයෙන් බස්සවා ගැනීම සඳහා කුරුණෑගල මහ නගර සභාවේ ගිනි නිවන ඒකකයේ නිලධාරීන් සහ පොලීසිය මහත් පරිශ්‍රමයක් ගෙන ඇති බව සඳහන්.
මේ අතර මෙම සිද්ධිය පිළිබඳව අදාළ පුද්ගලයාගේ මව සඳහන් කර සිටියේ,
“මෙයා ගස් කප කප හිටියේ වත්තක. ඒ ගෙදරට සිගරට් ගේන්න ගිහින් තියෙනවා බයිසිකලේ. ඒ එනකොට පොලීසියෙන් අල්ලගෙන.අල්ලගෙන කිව්වලු උඩහා එක්කෙනෙක් ඉන්නවා ගේන්න යමු කිව්වලු. මෙයා බෑ කිව්වලු. බෑ කියද්දි අරන් ගිහින් කෙලින්ම පොලීසියට ආවලු. ඊට පස්සේ පොලීසියෙන් නඩුවක් දාලා. 6 වෙනදා නඩුව තිබුණේ. මෙයාට බයිසිකලයක්ම නෑ. උසාවියෙන් කෙලින්ම 56,000ක දඩයක් ගැහුවා. දුම් සහතිකය නෑ. ලයිසන් නෑ කියලා තමා දඩේ ගැහුවේ. මෙයා කියන්නේ ඇයි මම වරදක් කරන්නේ නැතුව මට මෙහෙම දඩයක් ගහන්නේ කියලා. බයිසිකලේ අයිතිකාරයා එහෙ.”
