ආරක්ෂක ගැටලු මත නිව් යෝර්ක් නගරය, රජය සතු උපාංග මත TikTok තහනම් කර තිබේ.
කෙටි වීඩියෝ බෙදාගැනීමේ යෙදවුමට එවැනි සීමාවන් පනවා ඇති එක්සත් ජනපද නගර සහ ප්‍රාන්ත ගණනාවක් අනුව යමින් නිව්යෝර්ක් මෙම තීරණය ගෙන ඇත.
මිලියන 150 කට අධික ඇමරිකානුවන් විසින් භාවිතා කරනු ලබන සහ චීන තාක්‍ෂණ දැවැන්තයෙකු වන ByteDance සතු වන TikTok, හරහා සිදුවිය හැකි චීන රජයේ බලපෑම පිළිබඳ කනස්සල්ලත් සමග රටපුරා තහනමක් පැනවීම සම්බන්ධයෙන් එක්සත් ජනපද නීති සම්පාදකයින් සාකච්ඡා කරමින් සිටී.
නිව් යෝර්ක් නගරයේ නගරාධිපති නිවේදනයක් නිකුත් කරමින් කියා සිටියේ TikTok “නගරයේ තාක්ෂණික ජාලයන්ට ආරක්ෂක තර්ජනයක්” බවයි.
නිව් යෝර්ක් නගරයේ නියෝජිතායතනය දින 30ක් ඇතුළත යෙදවුම ඉවත් කිරීමට අවශ්‍ය වන අතර සේවකයින්ට නගරය සතු උපාංග සහ ජාල ඔස්සේ යෙදවුමට සහ එහි වෙබ් අඩවියට ප්‍රවේශය අහිමි වනු ඇත.
TikTok පැවසුවේ එය “එක්සත් ජනපද පරිශීලක දත්ත චීන රජය සමඟ බෙදාගෙන නොමැති හෝ බෙදා නොගන්නා අතර TikTok පරිශීලකයින්ගේ පෞද්ගලිකත්වය සහ ආරක්ෂාව ආරක්ෂා කිරීමට සැලකිය යුතු පියවර ගෙන ඇති” බවයි.
හිටපු ජනාධිපති ඩොනල්ඩ් ට්‍රම්ප් 2020 දී TikTok හි නව බාගත කිරීම් තහනම් කිරීමට උත්සාහ කළ නමුත් අධිකරණ තීන්දු මාලාවක් තහනම බලාත්මක වීම අවහිර කළේය.
මේ අතර TikTok සමාජයේ සංස්කෘතික හා ආගමික සදාචාරය ඛාදනය වීමට දායක වන බව පවසමින් එය භාවිතය තහනම් කරන ලෙස කෙන්යානු විධායක නිලධාරියෙක් එරට පාර්ලිමේන්තුවට පෙත්සමක් ගොනු කර තිබේ.
බ්‍රිජට් කනෙක්ට් කන්සල්ටන්සි හි විධායක නිලධාරී බොබ් එන්ඩෝලෝ ජාතික සභාවට පෙත්සමක් ඉදිරිපත් කරමින්, තරුණයින් පැහැදිලි ලිංගික අන්තර්ගතයන්ට නිරාවරණය වන බැවින් රට තුළ ටික්ටොක් භාවිතය තහනම් කරන ලෙස මන්ත්‍රීවරුන්ගෙන් ඉල්ලා සිටියේය.
