බැක්ටීරියාව වැළදුණු රැදවියන් ගණන ඉහළට

ගාල්ල බන්ධනාගාරයේ පැතිර යන මෙනින්ගොකොකොල් බැක්ටීරියාව වැළදුණු රැදවියන් 16 දෙනෙකු මේ වනවිට හදුනාගෙන තිබෙනවා.

බන්ධනගාර මාධ්‍ය ප්‍රකාශක, චන්දන ඒකනායක මහතා බන්ධනාගාර මූලස්ථානයේ අද(22) පැවති මාධ්‍ය හමුවකට එක්වෙමින් කියා සිටියේ ඉන් 9 දෙනෙකු කරාපිටිය ශික්ෂණ රෝහලේත්, 7 දෙනෙකු බන්ධනාගාර රෝහලේත් රදවා සිටින බවයි.

මෙම බැක්ටීරියාව වැළදුණු රැදවියන් දෙදෙනෙකු කරාපිටිය ශික්ෂණ රෝහලට ඇතුළත් කිරීමෙන් පසුව මියගොස් තිබුණා.

ඊයේ (21) සහ පෙරේදා මියගිය මෙම රැදවියන් දෙදෙනාගේ පශ්චාත් මරණ පරීක්ෂණ එම රෝහලේදී ඊයේ පැවති අතර එහිදී විවෘත තීන්දුවක් ලබා දී තිබුණා.

ඒ අනුව මොවුන්ගේ ශරීර කොටස් වැඩිදුර විමර්ශන සඳහා රජයේ රස පරීක්ෂක වෙත යොමුකිරීමටයි තීරණය කර තිබෙනවා.

නියෝජ්‍ය සෞඛ්‍ය සේවා අධ්‍යක්ෂ ජනරාල් වෛද්‍ය ජී. විජේසූරිය මහතා කොළඹ අද පැවති මාධ්‍ය හමුවකට එක්වෙමින් සඳහන් කළේ මෙම බන්ධනාගාරයේ සිට ඉන් පිටව ගිය රැදවියෙකු මීට පෙර උණ රෝගී තත්ත්වයක් මත ජීවිතක්ෂයට පත්ව ඇති බවත් ඔහුගෙන් මෙම උණ රෝගය පැතිරෙන්නට ඇති බවට සැක කරන බවයි.

මෙම තත්වය මත අධිකරණ වල විභාග වන නඩු කටයුතු සඳහා ගාල්ල බන්ධනාගාරයේ රැඳවියන් ඉන් පිටතට ගෙනයාම තාවකාලිකව අත්හිටුවීමට තීරණය කර තිබෙන බවට වාර්තා වෙනවා.

ඒ අනුව සති දෙකක කාලයක් සඳහන් මෙලෙස රැඳවියන් පිටතට ගෙනයාම අත්හිටුවා ඇති බව ගාල්ල බන්ධනාගාර අධිකාරීවරයා පවසා සිටියා.

මේ අතර බන්ධනාගාර අධිකාරීවරයා වැඩිදුරටත් පවසන්නේ අත්‍යවශ්‍ය අවස්ථාවන්හිදී සූම් තාක්ෂණය ඔස්සේ රැඳවියන් නඩු කටයුතු සඳහා ඉදිරිපත් කරන බවයි.