කැනේඩියානු අග්රාමාත්ය ජස්ටින් ටෘඩෝ ඉන්දියාවේ සිදු කළ සංචාරයේදී ඔහුගේ ගුවන් යානය සම්බන්ධයෙන් හට ගත් යම් දෝෂයක් හේතුවෙන් ඔහුගේ සංචාරය සැලසුම් කළ කාලයට වඩා දින දෙකකින් දීර්ඝ වී තිබෙනවා.
G20 සමුළුව අවසානවීමත් සමඟ පසු ඔහු කැනඩාව බලා පිටත්ව යාමට නියමිතව තිබූ නමුත් ගුවන් යානයේ හට ගත් කාර්මික දෝෂයක් හේතුවෙන් ඔහුට ඉන්දියාවේ තව දිනක් රැඳී සිටීමට සිදුව තිබුණා.
කෙසේ වෙතත් කැනේඩියානු අග්රාමාත්ය ජස්ටින් ටෘඩෝ මේ වන විට ඉන්දියාවෙන් පිටව ගොස් තිබෙනවා.
මෙම ප්රමාදය සම්බන්ධයෙන් කැනඩාවේ ඔහුගේ විරුද්ධවාදීන් මෙන්ම ඉන්දියාවේ සමාජ මාධ්ය පරිශීලකයින් ඔහුව හාස්යයට ලක් කර ඇති බව විදෙස් මාධ්ය වාර්තා කරනවා.
බීබීසි ලෝක සේවය වාර්තා කරන්නේ මෙම සිදුවීමට පෙර කැනේඩියානු අග්රාමාත්ය ටෲඩෝ ඉන්දීය අගමැති නරේන්ද්ර මෝදි හමුවී ඇති අතර එය එතරම් මිත්රශීලී හමුවක් නොවුණු බවයි .
මේ අතර කැනඩාව සහ ඉන්දියාව අතර සබඳතා පසුගිය කාලයේ අයහපත් අතට හැරෙමින් තිබෙන බව විදෙස් මාධ්ය පවසනවා.
මෙවන් පසුබිමක ජස්ටින් ටෘඩෝගේ ඉන්දියානු සංචාරය කැනඩාව හා ඉන්දියාව අතර සබඳතා ශක්තිමත් කිරීම වෙනුවට එය වඩා අයහපත් තත්වයකට පරිවර්තනය වීමට හේතු වී ඇති බවයි වාර්තා වෙන්නේ.
කැනේඩියානු අග්රාමාත්යවරයා ඉන්දියාවට පැමිණීමට පෙර කැනඩාව සහ ඉන්දියාව අතර පවතින වෙළඳ ගිවිසුමක් පිළිබඳ සාකච්ඡා නතර කරන බවද නිවේදනය කර තිබෙනවා.
කෙසේවෙතත් කැනඩාව සහ ඉන්දියාව අතර හට ගෙන ඇති මෙම ආතතියට කැනඩාවේ මේ වන විට මතුව ඇති සික් ජාතිකයින්ගේ විරෝධතා හේතු වී ඇති බව විදෙස් මාධ්ය පවසනවා .