එළැඹෙන අයවැය යෝජනාවලිය මගින් සියලුම රාජ්‍ය සේවකයින්ගේ වැටුප් වැඩි කිරීමට පියවර ගන්නා බව ජනාධිපති රනිල් වික්‍රමසිංහ පවසනවා.
අද (30) පස්වරුවේ ජනාධිපති ලේකම් කාර්යාලයේ පැවති අමාත්‍ය මණ්ඩල රැස්වීමට එක්වෙමින් ජනාධිපතිවරයා මේ බව පවසා තිබෙනවා.
එමෙන්ම රජයේ සේවකයන්ගේ වැටුප් වැඩිවීමට සාපේක්ෂව පෞද්ගලික අංශයේ වැටුප් වැඩිකිරීමට ඉල්ලීමක් කරන බවද ජනධිපතිවරයා සඳහන් කර තිබෙනවා.
ජනාධිපතිවරයා මෙහිදී සඳහන් කර ඇත්තේ වත්මන් ආණ්ඩුව රාජ්‍ය සේවකයින්ගේ වැටුප් වැඩි කිරීමට සූදානම් වන බව දැනගත් ජනතා විමුක්ති පෙරමුණ ඇතුළු කණ්ඩායම් එය ඔවුන්ගේ බලපෑම අනුව සිදුවූ බවට පැවසීමට උත්සාහ දැරීම කිසිදු පදනමක් නැති බවයි.
රටේ පවතින උද්ධමනය සැලකිල්ලට ගනිමින් වැඩකරන ජනතාවගේ වැටුප් ඉහළ දැමීම වත්මන් රජයේ ප්‍රතිපත්තිය බවද ජනාධිපතිවරයා අමාත්‍ය මණ්ඩල රැස්වීමේදී පවසා තිබෙනවා.
2024 වර්ෂය සඳහා වූ අයවැය යෝජනාවලිය එළැඹෙන නොවැම්බර් 13 වැනිදා ජනාධිපති රනිල් වික්‍රමසිංහ විසින් පාර්ලිමේන්තුවට ඉදිරිපත් කිරීමට නියමිතයි.
