Binance (බයිනෑන්ස්) සමාගමේ ප්‍රධාන විධායක,චංපෙන්ග් ජාඕ එම සමාගමෙන් ඉල්ලා අස්වී තිබෙනවා.
X ගිණුමේ සටහනක් එක්කරමින් ඔහු පවසා ඇත්තේ තමා වැරදි කළ බවත් එහි වගකීම භාරගත යුතු බවත් එය තමා, Binance සමාගම හා ප්‍රජාව වෙනුවෙන් සිදුකළ හැකි සුදුසුම දේ බවත් ඔහු වැඩිදුරටත් පවසා තිබෙන බවට වාර්තා වනවා.
ඒ ඔහුට එරෙහිව එල්ල වූ මුදල් විශුද්ධිකරණ චෝදනා සඳහා වැරැද්ද පිළිගැනීමෙන් අනතුරුවයි.
එක්සත් ජනපද බලධාරීන් විසින් Binance සමාගමට ඩොලර් බිලියන 4.3ක දඩ මුදලක් ගෙවන ලෙස දැනුම්දී තිබෙනවා.
ඒ සම්බාධක පනවා ඇති රටවලට සහ වෙළෙඳපොළ වලට මුදල් හුවමාරු කිරීම සඳහා Binance හුවමාරුව යොදාගැනීම හේතුවෙන්.
විශේෂයෙන් ඉරාන ග්‍රාහකයින්ට ඩොලර් මිලියන 900ක් පමණ වටිනා හුවමාරු සඳහා Binance භාවිත කර ඇති බවත් ඊට අමතරව රුසියාව, සිරියාව වැනි සම්බාධක පනවා ඇති රටවල් සමගත් ඒ ඔස්සේ මුදල් හුවමාරු කර තිබූ බවත් වාර්තා වනවා.
BINANCE යනු ලොව විශාලතම ක්‍රිප්ටෝ මුදල් හුවමාරු වේදිකාව වන අතර එය කේමන් දිවයිනේ ලියාපදිංචි කර තිබෙන සමාගමක් වනවා.
