ශ්රී ලංකා නාවික හමුදාව වෙනුවෙන් ඉදිකරන ටොන් 4000ක පාවෙන තටාකයේ ඉදිකිරීම් ආරම්භ කිරීමේ උත්සවය ගෝවාහිදී අද (08) පැවැත්වුණා.
නාවික හමුදා මාධ්ය ඒකකය සඳහන් කළේ මෙම අවස්ථාවට ශ්රී ලංකාවේ ඉන්දීය මහ කොමසාරිස් ගෝපාල් බාග්ලේ, ශ්රී ලංකා නාවික හමුදාපති වයිස් අද්මිරාල් යූ.වී.එම්.පී. පෙරේරා සහ පාවෙන තටාකය සඳහා වන ඒකාබද්ධ අධීක්ෂණ කමිටුවේ දෙරටෙහි නියෝජිතයන් අන්තර්ජාලය ඔස්සේ සහභාගී වූ බවයි.
මෙම ව්යාපෘතිය ඉන්දියාව සහ ශ්රී ලංකාව අතර පවතින දිගු කාලීන සහයෝගීතාවයේ, සහෝදරත්වයේ සහ මිත්රත්වයේ බැඳීම් සංකේතවත් කරන බවත්, ඉන්දියාව කලාපයේ සැමට ආරක්ෂාව සහ වර්ධනය යන දැක්ම සහ ‘අසල්වැසියා ප්රථමයෙන්’ යන ප්රතිපත්තිය සාක්ෂාත් කරගැනීම සඳහා ශ්රී ලංකාවේ ආරක්ෂක හමුදාවන්ගේ ධාරිතා ගොඩනැගීම සහ තිරසාර සංවර්ධනය වෙනුවෙන් කැප වී කටයුතු කළ අවස්ථාවක් බවත් ඉන්දියාවේ ශ්රී ලංකා මහ කොමසාරිස්වරයා එහිදී සඳහන් කර තිබෙනවා.
ශ්රී ලංකා නාවික හමුදාව සඳහා පාවෙන තටාකයක් ලබාදීමේ ව්යාපෘතිය ඉන්දීය සහ ශ්රී ලංකා නාවික හමුදාවන් අතර, ශක්තිමත් බැඳීම තවදුරටත් ඉහළ නංවා ඇති බව මහ කොමසාරිස්වරයා එහිදී ප්රකාශ කර තිබෙනවා.
මෙම පාවෙන තටාකය ශ්රී ලංකා නාවික හමුදාවේ සියලු නඩත්තු අවශ්යතාවයන් සපුරාලනු ඇති අතර, එමගින් කලාපයේ සමුද්රීය ආරක්ෂාව ඉහළ නංවනු ඇති බව ද ඔහු එහිදී සඳහන් කළා.
දිග මීටර් 115 ක් දක්වා වන නෞකා පාවෙන තටාකයේ නැංගුරම් දැමිය හැකි අතර තටාකයේ එසවුම් ධාරිතාවය ටොන් 4000 ක්.