දෙහිවල සෝල් බීච් හෝටලය කඩා ඉවත් කිරීම තුළින් සිය මූලික මිනිස් අයිතිවාසිකම් උල්ලංඝනය වූ බවට තීන්දුවක් ලබා දෙන ලෙස ඉල්ලා වැඩ බලන පොලිස්පති දේශබන්දු තෙන්නකෝන් ඇතුළු පිරිසකට එරෙහිව ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කර තිබෙනවා.
ඒ අනුව, සොල් බීච් ප්‍රයිවට් ලිමිටඩ් සහ එහි අධ්‍යක්ෂවරුන් තුන් දෙනෙකු විසින් මෙම පෙත්සම ගොනු කර තිබෙනවා.
එම පෙත්සමේ වග උත්තරකරුවන් ලෙස වැඩ බලන පොලිස්පති දේශබන්දු තෙන්නකෝන්, නියෝජ්‍ය පොලිස්පති ජී.එච්. මාරපන, ගල්කිස්ස ප්‍රදේශයේ භාර ජේෂ්ඨ පොලිස් අධිකාරී මංගල දෙහිදෙණිය, ඇතුළු පිරිසක් නම් කර තිබෙනවා.
පෙත්සම්කරුවන කියා සිටින්නේ, අදාළ ස්ථානයේ ව්‍යාපාරික ආයතනයක් පවත්වාගෙන යාම සඳහා තමන්ට නීත්‍යානුකූල අවසරය ලැබී තිබු බවත්, එසේ තිබියදී වගඋත්තරකරුවන් විසින් කිසිදු සාධාරණ හේතුවක් නොමැතිව තම ව්‍යාපාරික ස්ථානය කඩා ඉවත් කිරීම තුළින් සිය මූලික මිනිස් අයිතිවාසිකම් උල්ලංඝනය වූ බව පෙත්සම්කරුවන් පවසනවා.
එබැවින් වග උත්තරකරුවන්ගෙන් තමන්ට වන්දි අයකර දෙන ලෙස නියෝගයක් නිකුත් කරන ලෙසත්, මෙම සිද්ධියට සම්බන්ධ පොලිස් නිලධාරීන් ඇතුළු රජයේ නිලධාරීන්ට එරෙහිව විනය ක්‍රියාමාර්ග ගන්නා ලෙසත්, රාජ්‍ය සේවා කොමිසම වෙත නියෝගයක් නිකුත් කරන ලෙසත් පෙත්සම්කරුවන් ශ්‍රේෂ්ඨාධිකරණයෙන් ඉල්ලා තිබෙනවා.
පෙත්සම මගින් වැඩිදුරටත් ඉල්ලා සිටින්නේ, එසේම කඩා ඉවත් කෙරුණු සිය ව්‍යාපාරික ස්ථානය පිහිටි ස්ථානයේම නැවත ව්‍යාපාරික කටයුතු පවත්වාගෙන යාමට අවශ්‍ය අනුමැතිය ලබාදෙන ලෙස වගඋත්තරකරුවන්ට නියෝගයක් නිකුත් කරන ලෙසයි.
