එක්ස්ප්‍රස් පර්ල් නෞකාව ගිනි ගැනීමේ සිද්ධිය හේතුවෙන් සිදු වූ හානිය වෙනුවෙන් වන්දි අය කර දෙන නියෝගයක් නිකුත් කරන ලෙස ඉල්ලා ධීවර ප්‍රජාව විසින් ඉදිරිපත් කළ පෙත්සමක් කොළඹ වාණිජ මහාධිකරණය විසින් අද (09) නිෂ්ප්‍රභ කළා.
කොළඹ වාණිජ මහාධිකරණ විනිසුරු ප්‍රදීප් හෙට්ටිආරච්චි මහතා විසින් මෙම තීන්දුව ලබාදී තිබෙනවා.
මීට පෙර අදාළ පෙත්සම සලකා බැලූ අවස්ථාවේ දී ධීවර ප්‍රජාව වෙනුවෙන් පෙනී සිටි නීතිඥ හිමාලි කුලරත්න මෙනෙවිය අධිකරණය හමුවේ කරුණු දක්වමින් මෙම නෞකා අනතුර හේතුවෙන් ධීවර පවුල් 20,000 කට අධික සංඛ්‍යාවක් අගතියට පත්ව සිටින බව සඳහන් කර තිබුණා.
අදාළ නෞකා සමාගමේ නොසැලිකිලිමත් හා වගකීමකින් තොර ක්‍රියා කලාපය හේතුවෙන් මෙම තත්ත්වය උද්ගත වූ බව සඳහන් කළ නීතිඥවරිය, ඒ අනුව පෙත්සම විභාගයට ගැනීම සඳහා නොතීසි නිකුත් කරන ලෙස අධිකරණයෙන් ඉල්ලා තිබෙනවා.
අදාළ පෙත්සම විභාගයට ගැනීම සඳහා නොතිසි නිකුත් කිරීමකින් තොර ව එය නිෂ්ප්‍රභ කිරීමට නියෝග කරන බව, ඒ අනුව අද දින නියෝගය ප්‍රකාශයට පත් කරමින් විනිසුරුවරයා සඳහන් කරනු ලැබුවා.
ධීවර ප්‍රජාව සිය පෙත්සම තුළින් කියා සිටියේ, අදාළ නෞකා අනතුර හේතුවෙන් තම ප්‍රජාවට සිදු වූ හානිය වෙනුවෙන් එක්ස්ප්‍රස් පර්ල් නැව් සමාගමෙන් අමෙරිකානු ඩොලර් බිලියන 1.17ක වන්දියක් ගෙවන මෙන් නියෝගයක් නිකුත් කරන ලෙසයි.
