මියන්මාර ජාතිකයින් පිරිසක් රැගත් බහුදින ධීවර යාත්‍රාවක් අද (19) මුලතිව්, මුල්ලිවයික්කාල් වෙරළ තීරයට පැමිණ තිබෙනවා.
මුලතිව්, නාවික හමුදාව හා පොලීසිය පවසන්නේ මෙම යාත්‍රාවේ 100කට අධික පිරිසක් රැදී සිට ඇති බවයි.
මෙම පිරිස අතර දරුවන් 25කට ආසන්න පිරිසක් සිටින බව අනාවරණය වී තිබෙනවා.
ඔවුන් සරණාගතයින් ලෙස මියන්මාරයේ සිට නීතිවිරෝධීව වෙනත් රටකට බහුදින යාත්‍රාවකින් රැගෙන යමින් සිටියදී එලෙස මුල්ලිවයික්කාල් වෙරළ තීරයට පැමිණ ඇති බව තවදුරටත් වාර්තා වෙනවා.
පොලිසිය හා නාවික හමුදාව පවසන්නේ යාත්‍රාවේ සිටින පිරිස වෙත අවශ්‍ය ආහාර ද්‍රව්‍ය හා ජලය ලබාදීම නාවික හමුදාව විසින් සිදුකරනු ලබන බවයි.
එමෙන්ම, යාත්‍රාව සහ මගීන් සම්බන්ධයෙන් ගන්නා පියවර කුමක් ද යන්න සම්බන්ධයෙන් සලකා බලන බව ආරක්ෂක අංශ තවදුරටත් දැනුම් දෙනවා.
