දෙමෝදර ආරුක්කු නවය පාලම ආසන්නයේ මධුරගම කොටසේ ෆයිනස් වගා රක්ෂිතයට කිසියම් පුද්ගලයෙක් ගිනි තබා තිබෙනවා.
මේ හේතුවෙන් රක්ෂිතයේ විශාල කොටසක් අද (23) උදෑසන වනවිටත් ගිනි ගනිමින් පැවති අතර, ආරුක්කු නවය ප්‍රදේශයට පැතිරෙමින් පැවති ගින්න, යුද හමුදා නිලධාරින්ගේ මැදිහත්වීමෙන් පාලනය කර තිබෙන බව සඳහන්.
නමුත් ගින්න ඇල්ල පොලීසිය ආශ්‍රිතව ඇති රක්ෂිතය වෙත මේ වනවිට පැතිරෙමින් පවතින බවයි වාර්තා වන්නේ.
යුද හමුදා නිලධාරීන්, පොලීසිය, ආපදා කළමනාකරණ ඒකකය හා ප්‍රාදේශීය ලේකම් කාර්යාල නිලධාරීන් එක්ව මේ වනවිටත් ගින්න පාලනයට කටයුතු කරමින් සිටිනවා.
ප්‍රදේශය පුරා පවතින අධික වියළි ස්වභාවය හා තද සුළං හේතුවෙන් ගින්න පාලනය කිරීම අපහසු වී ඇති අතර මේ වනවිට රක්ෂිතයේ ගස්වලට සහ සත්වයින්ට විශාල ලෙස හානි සිදුව තිබෙන බවයි වාර්තා වන්නේ.
