පන්නිපිටිය ධර්මපාල විද්‍යාලයේ පිහිටුවා ඇති උසස්පෙළ පිළිතුරු පත්‍ර ඇගයිමේ මධ්‍යස්ථානයට පිළිතුරු පත්‍ර ඇගයීම සඳහා ගවුම්වලින් සැරසී පැමිණි ගුරුවරියන් පිරිසක් හරවා යැවීමට එම පාසලේ විදුහල්පතිනිය කටයුතු කර තිබෙනවා.
ඔවුන් පාසල තුළට ගැනීම ප්‍රතික්ෂේප කිරීමට විදුහල්පතිනිය කටයුතු කර ඇත්තේ අදාළ ගුරුවරියන් සාරිය හැඳගෙන නොපැමිණි බව දක්වමින්.
මෙහිදී පිළිතුරු පත්‍ර ඇගයීමට පැමිණි ගුරුවරියන් පවසා ඇත්තේ එම ඇගයීම් මධ්‍යස්ථානයේ පාලනය විභාග කොමසාරිස් ජනරාල්වරයා සතු බැවින් ඒ පිළිබඳව විදුහල්පතිනියට වගකීමක් නොමැති බවයි.
පාසලක යම් විනයක් ඇති බවත් පාසල තුළට පැමිණෙන සියලුදෙනා ඊට අනුගත විය විදුහල්පතිනිය පවසා තිබෙනවා.
එහිදී දෙපිරිස අතර යම් බහින්බස්වීමක් ද සිදුවී ඇති අතර එය පාලනය කිරීම සඳහා පොලීසිය කැඳවීමටද විදුහල්පතින්නිය පියවර ගෙන තිබුණා.
කෙසේවෙතත් දෙපිරිසටම එකඟතාවයකට පැමිණීමට නොහැකි වී ඇති පසුබිමක විභාග කොමසාරිස් ජනරාල්වරයා උපදෙස් පරිදි එම මධ්‍යස්ථානය තාවකාලිකව වසා දැමීමට කටයුතු කරනු ලැබුවා.
මේවන විට අදාළ ගැටලුවට මුහුණ පෑ ගුරුවරියන් පිරිස විභාග දෙපාර්තමේන්තුවේ ස්ථාපිත කරනු ලබන ඇගයීම් මධ්‍යස්ථානයට කැඳවා එහි සිට පිළිතුරු පත් ඇගයීම් කටයුතු සිදුකිරීමට විභාග කොමසාරිස් ජනරාල් අමිත් ජයසුන්දර මහතා පියවර ගෙන ඇති බවද වාර්තා වෙනවා.
