ශ්‍රී ලංකාවේ විදුලිබල ක්ෂේත්‍රයේ යටිතල පහසුකම් දියුණු කිරීම වෙනුවෙන් ආසියානු සංවර්ධන බැංකුව ඩොලර් මිලියන 200ක ණය මුදලක් අනුමත කර තිබෙනවා.
නිවේදනයක් නිකුත් කරමින් ආසියානු සංවර්ධන බැංකුව සඳහන් කළේ, ශ්‍රී ලංකා රජයේ වගකීමට යටත්ව සමස්ත ණය මුදලෙන් ඇමෙරිකානු ඩොලර් මිලියන 150ක් ලංකා විදුලිබල මණ්ඩලයට සහ ඇමෙරිකානු ඩොලර් මිලියන 50ක් ලංකා විදුලි සමාගමට ලබා දීමට නියමිත බවයි.
මෙමඟින් විදුලිය සම්ප්‍රේෂණ සහ බෙදාහැරීමේ ජාලයන්හි විශ්වසනීයත්වය වැඩි දියුණු කිරීම සහ පුනර්ජනනීය බලශක්තිය වැඩි වශයෙන් ඒකාබද්ධ කිරීමට පහසුකම් සැලසීමට අපේක්ෂා කෙරෙනවා .
ශ්‍රී ලංකාව 2016 දී වසරේදී නිවාස සඳහා විදුලි බලය සැපයීම 100% කින් සපුරා ගැනීමර සමත් වූ අතර 2023 වසරේදී පුනර්ජනනීය බලශක්තියෙන්ද සැලකිය යුතු දායකත්වයක් ලැබීමත් සමඟ මෙරට විදුලි බල ඉල්ලුම එහි උපරිම අගය වාර්තා කරමින් මෙගාවොට් 2,800 (MW) දක්වා ළඟා වුණා.
එමෙන්ම එය එය 2030 වනවිට සැලකිය යුතු ලෙස වර්ධනය වෙතැයි අනුමාන කෙරෙනවා.
මෙම ව්‍යාපෘතිය මඟින් පාරිභෝගිකයන් වෙත විදුලිය බෙදා හැරීම සම්බන්ධයෙන් වග කිව යුතු ආයතන වන ලංකා විදුලිබල මණ්ඩලයේ (CEB) සහ ලංකා විදුලි සමාගමේ (LECO) ආයතනික හැකියාවන් ශක්තිමත් කිරීමටද අපේක්ෂිතයි.
