ඇමෙරිකාවේ ලොස් ඇන්ජලීස් නුවර පැතිර යන ළැව් ගිනි හේතුවෙන් එරට ආර්ථිකයට සිදුව ඇති පාඩුවඅද අද (12) වනවිට ඩොලර් බිලියන 150 ක් දක්වා ඉහළ ගොස් ඇතැයි විදෙස් මාධ්‍ය වාර්තා කළා.
ළැව් ගිනි හේතුවෙන් පසුගිය 10 වැනිදා වනවිට ඇමෙරිකානු ආර්ථිකය සිදුවූ ඇති පාඩුව ඩොලර් බිලියන 52ත් 57ත් අතර වන බවට ඇස්තමේන්තු කර තිබූ නමුත් එය දිනක් තුළ බිලියන 135ත් 150ත් අතර දක්වා ඉහළ යෑමෙන් ළැව් ගිනි ඇමෙරිකාවට කර ඇති විනාශයේ බරපතළකම පෙන්නුම් කරන බව විදෙස් මාධ්‍ය සදහන් කරනවා.
මේ වනවිට ළැව් ගිනි හේතුවෙන් මියගිය සංඛ්‍යාව 16 දක්වා ඉහළ ගොස් ඇති බවත්, පැලිසේඩ්ස් සහ ඊට්න් ළැව් ගිනි එම මරණවලට හේතුවී ඇති බවත් තවත් 13 දෙනකු අතුරුදන් වී ඇති බවත් ඇමෙරිකානු බලධාරීන් ප්‍රකාශ කරනවා.
පසුගිය 9 වැනිදා හටගත් කෙනත් ළැව් ගින්නෙන් 90% ක් මැඩ පැවැත්වීමට ගිනි නිවනභටයින් අද(12) වනවිට හැකියාව ලැබී තිබූ අතර හර්ස්ට් ළැව් ගින්නෙන් 76% ක් මැඩ පැවැත්වීමට ගිනි නිවන භටයින්ට හැකියාව ලැබුණා.
නමුත් අද වනවිටත් ගිනිනිවන භටයින්ට පැලිසේඩ්ස් ළැව් ගින්නෙන් මැඩ පැවැත්වීමට හැකියාව ලැබී ඇත්තේ 11% පමණක් වන අතර ඊට්න් ළැව් ගින්නෙන් මැඩ පැවැත්වීමට හැකියාව ලැබී ඇත්තේ 15% ක් පමණයි.
