කොළඹ ජාත්‍යන්තර පොත් ප්‍රදර්ශනයේදී අද (03) පස්වරුවේ මාධ්‍යවේදී කල්ප ගුණරත්න මහතා අත්තනෝමතික ලෙස පොලිස් අත්අඩංගුවට ගෙන තිබෙනවා.
මීට හේතු වී ඇත්තේ පොත් ප්‍රදර්ශන භූමියේ ඇති සරසවි පොත් හලේ ප්‍රදර්ශනය කුටිය ඉදිරිපිට සිදුවූ පහරදීමේ සිදුවීමකි.
සරසවි පොත් කුටියේ ආරක්ෂාවට සිටි ආරක්ෂකයෙකු හා තරුණයෙකු බහින්බස්වීමක් සිදුවී අදාළ ආරක්ෂකයා මෙම තරුණයාට පහරදීමට පටන්ගෙන තිබෙනවා.
එය දුටු තමන් ඊට විරෝධය පලකර පොත් ප්‍රදර්ශනයට පුද්ගලයන් පැමිණෙන්නේ ගුටිකෑමට නොවන බව පැවසුවත් එය නොතකා මෙම ආරක්ෂකයා තරුණයාට තවදුරටත් පහරදුන් බව කල්ප ගුණරත්න මහතා පවසනවා.
පසුව අදාළ සිදුවීම කල්ප ගුණරත්න මහතා වීඩියෝ කරන අතරතුර එම ස්ථානයට බණ්ඩාරනායක සම්මන්ත්‍රණ ශාලා පරිශ්‍රය භාර පොලිස් නිලධාරී සී.අයි. නියෝමාල් මහතා පැමිණි අවස්ථාවේ සරසවි පොත් හලේ ආරක්ෂකයන් පවසා ඇත්තේ කල්ප ගුණරත්න මහතා වීඩියෝ කිරීම හේතුවෙන් මෙම ස්ථානයේ කළබලයක් ඇතිවූ බවයි.
අනතුරුව ඔහු සතු පැරණි මාධ්‍ය හැඳුනුම්පත් දෙකක් බලහත්කාරයෙන් තමන් සන්තකයට ගෙන වලංගු මාධ්‍ය හැඳුනුම්පතක් නොමැති බව පවසා නියෝමාල් නැමැති පොලිස් නිලධාරියා කල්ප ගුණරත්න මහතාව කුරුඳුවත්ත පොලීසියට රැගෙන ගොස් තිබුණා.
කුරුඳුවත්ත පොලීසියේදී ඔහුම පැමිණිල්ලක් පොලිස් පොතේ ලියා කල්ප ගුණරත්න මහතාට අපූරු චෝදනාවක් ගොනුකර තිබෙනවා.
ඒ BMICH පරිශ්‍රයේ ඔහු මහජන සාමය කඩවන අයුරින් කටයුතු කළ බවයි.
ඒ අනුව පැය තුනකට අධික කාලයක් කල්ප ගුණරත්න මහතාට මෙම පොලිස් නාටකය නිසාවෙන් පොලිස් කූඩුවේ සිටීමට සිදුවූ අතර පසුව මාධ්‍ය නීති සංසදයේ නීතිඥවරුන් පැමිණ පොලිස් ඇප ලබා ගැනීමට අවශ්‍ය කටයුතු සිදුකර තිබෙනවා.
නියෝමාල් නැමැති මෙම නිලධාරියා සරසවි පොත්හලේ ආරක්ෂකයාගෙන් පහරකෑමට ලක්වූ තරුණයා පිළිබදව කිසිවක් විදු නොකළ පසුබිමක එම තරුණයාම පොලීසියට පැමිණ අදාළ සිදුවීම සම්බන්ධයෙන් පැමිණිල්ලක් ඉදිරිපත් කර තිබෙනවා.
ඒ වන විටත් පහර කෑමෙන් ඔහුගේ හිසට බරපතළ තුවාල සිදුව ඇති බවයි වාර්තා වන්නේ.
