රාජ්‍ය ආයතනවල ජල බිල්පත් ගාස්තු ගෙවීම් ප්‍රමාද වීම සම්බන්ධයෙන් ඉදිරියේ දී ප්‍රමාද ගාස්තුවක් අය කිරීමට ජල සම්පාදන හා ජලාපවහන මණ්ඩලය තීරණය කර තිබෙනවා.
ඒ අනුව ලබන වසරේ ජනවාරි සිට එම ගාස්තු අය කිරීමට තීරණය කර ඇති බවයි එම මණ්ඩලයේ ප්‍රකාශකයෙක් කියා සිටියේ.
ජල සම්පාදන හා ජලාපවහන මණ්ඩලය සඳහන් කළේ රාජ්‍ය ආයතන සඳහා ප්‍රමාද ගාස්තු මීට පෙර අය නොකළ අතර රාජ්‍ය ආයතන විසින් බිල්පත් ගෙවීම සඳහා ප්‍රමුඛතාව ලබාදීම අවම මට්ටමක පැවතීම හේතුවෙන් මෙම තීරණය ගත් බවයි.
මේ අනුව රාජ්‍ය ආයතන වෙත ජල බිල්පත් ලැබී දින 90ක කාලයක් තුළ එහි ගෙවීම් කළ යුතු අතර එසේ ගෙවීම් සිදු නොවන්නේ නම් එම රාජ්‍ය ආයතන සඳහා ප්‍රමාද ගාස්තු අය කිරීමට නියමිතයි.
ජල සම්පාදන හා ජලාපවහන මණ්ඩලය වැඩිදුරටත් කියා සිටියේ මේ සම්බන්ධයෙන් ඉදිරියේ දී චක්‍රලේඛයක් නිකුත් කිරීමට නියමිත බවයි.
