ශ්‍රී ලංකා පුරවැසියන් මෙම තීරණාත්මක අවස්ථාවේදී නීතියේ ආධිපත්‍යයට සහ ව්‍යවස්ථාවට ගරු කිරීම අත්‍යවශ්‍ය බව ශ්‍රී ලංකා නීතිඥ සංගමය අවධාරණය කරනවා.
ශ්‍රී ලංකා නීතියේ ආධිපත්‍යය සහ ආණ්ඩුක්‍රම ව්‍යවස්ථානුකූලභාවය අඩපණ බව හැගවෙන ඇතැම් විරෝධතා කණ්ඩායම්වල කොටස්කරුවන් ඇතුළු විවිධ පාර්ශව සිදුකල ප්‍රකාශ සම්බන්ධයෙන් අවධානය යොමු වී ඇති බවයි නිවේදනයක් නිකුත් කරමින් ඔවුන් සඳහන් කර සිටින්නේ.
පොලිස් මුලස්ථානය ඉදිරිපිටදී අරගලයට සම්බන්ධ පිරිසක් විසින් ආණ්ඩුක්‍රම ව්‍යවස්ථාව සම්බන්ධයෙන් සිදුකරනු ලැබු ප්‍රකාශයක් මේ වන විට සමාජ මාධ්‍ය තුල හුවමාරු වෙමින් පවතිනවා. එහිදී එම ප්‍රකාශය සිදුකරනු ලබන පුද්ගලයා සඳහන් කර සිටින්නේ ජුලි 09 වෙනිදායින් පසුව පවතින්නේ නව සම්මුතියක් බවයි.
ශ්‍රී ලංකාව පාලනය වන රාමුව වන ආණ්ඩුක්‍රම ව්‍යවස්ථාවේ විධිවිධාන නොසලකා හැරීම රටට හෝ එහි ජනතාවට හිතකර නොවන බවයි ශ්‍රී ලංකා නීතිඥ සංගමය වැඩිදුරටත් පෙන්වා දෙන්නේ. ආණ්ඩුක්‍රම ව්‍යවස්ථාවට, එහි ආයතනවලට සහ නීතියේ ආධිපත්‍යයට ගරු කිරීම ප්‍රජාවගේ සහ එහි ජනතාවගේ ජිවිතයට අත්‍යවශ්‍ය වන බව රජයේ අඛන්ඩ කාර්යයන් සහතික කරන බවද නීතිඥ සංගමය අවධාරණය කර සිටිනවා.
පක්ෂ නායකයන් ඉදිරිපත් කර ඇති කෙටිකාලීන රාමුව පිළිගනිමින් සාමකාමී සහ සුමට බල සංක්‍රමණයක් සඳහා වන ඉල්ලීම නැවත අවධාරණය කරන බවද එහි සඳහන්.
මේ අතර ජනාධිපති මන්දිරය, අරලිය ගහ මන්දිරය ඇතුලූ ස්ථානවල සිදු වන විනාශකාරී ක්‍රියා පිළිබඳ දැඩි අවධානය යොමුකර ඇති බවත් අදාල ගොඩනැගිලිවල භාරකාරත්වය නිසි බලධාරීන්ට ලබාදෙන ලෙසත් එහි රැඳී සිටින පිරිස්වලින් නීතීඥ සංගමය ඉල්ලා සිටිනවා.
