වඳුරඹ ප්‍රදේශයේ පාසලක 10 වන ශ්‍රේණියේ ඉගෙනුම ලබන සිසුවෙකුට පහර දී කඩදාසි කපන පිහියකින් එම සිසුවාගේ කන කපා බරපතළ තුවාල සිදුකර තිබෙනවා.
නාගොඩ පොලීසිය පවසන්නේ අදාළ පහරදීමට සම්බන්ධ පාසල් සිසුන් 5 දෙනෙකු මේ වන විට අත්අඩංගුවට ගෙන ඇති බවයි.
නාගොඩ, බෝවිටියමුල්ල හන්දියේ දී ඊයේ (03) දහවල් තුවාල ලැබු සිසුවාට තවත් පිරිසක් පහර දී තිබුණේ සවස 1.50ට පමණ වන අතර මෙලෙස අත්අඩංගුවට පත්ව ඇත්තේ එම ප්‍රදේශයේම පාසල් කිහිපයක 11 වනශ්‍රේණියේ ඉගෙනුම ලබන සිසුන් කිහිපදෙනෙක් බවයි සඳහන් වන්නේ.
පුද්ගලික ආරවුලක් මත අදාළ පහරදීම සිදුව ඇති අතර, පහරදුන් පිරිස අතැති කඩදාසි කපනයකින් සිසුවාගේ කනට පහළින් කපා තිබෙනවා.
පහරකෑමට ලක්වු සිසුවා ඉන් මිදීම සඳහා අසල ඇති කැලයකට රිංගා දිවි බේරාගෙන ඇති අතර එම සිදුවීමට අදාළ සිසුන් පිරිස ගම්වාසීන් එක්ව අල්ලාගෙන ඔවුන්ට පහරදී පොලීසියට භාරදී තිබුණා.පහරකෑමට ලක්වූ සිසුවා මේ වනවිට ගාල්ල, කරාපිටිය රෝහල වෙත ඇතුළත් කර තිබෙන බවයි සඳහන් වන්නේ.
