කොළඹ පිටකොටුව බෝධිරාජා මාවතේ ඇති ආපනශාලා ජින්තුපිටිය සෞඛ්‍ය වෛද්‍ය නිලධාරී කාර්යාලයේ නිලධාරීන් සහ මහජන සෞඛ්‍ය පරීක්ෂකවරුන් විසින් අද (21) පෙරවරුවේ හදිසි වැටලීමක් සිදුකර තිබෙනවා.
එහිදී ඇතැම් ආපනශාලා ඉතා අපිරිසිදු තත්ත්වයේ පැවැති අතර මුළුතැන්ගෙය ආශ්‍රිතව ආහාර පිසින ස්ථානයන් හී මීයන්ගේ අසූචි පැවතීම සහ මීයන්ගේ අසූචි ආහාර පිසින භාජනවලට එකතු කිරීම නිලධාරීන්ගේ දැඩි දෝෂ දර්ශනයට ද ලක් වුණා.
තවද ඇතැම් ආපනශාලා හී ආහාර පිසින ස්ථානයන් හි සුරතල් බළලුන් පවා සිටින අයුරුද මෙහිදි දක්නට ලැබුණා.
වැටලීම් සිදුකරනු ලබන අවස්ථාවේදී ආපනශාලා හිමිකරුවන් සහ අදාළ නිලධාරීන් අතර උණුසුම් තත්ත්වයක්ද නිර්මාණය වූ අතර ඇතැම් වෙළෙඳසැල් හිමියන් පැවසුවේ මී ග්‍රහණය වැඩි බවත් නගර සභාව විසින් මේ සඳහා පිළියම් යෙදීමක් සිදු නොකරන බවයි.
මෙහිදී සෞඛ්‍ය වෛද්‍ය නිලධාරීවරයා අදාළ වෙළෙඳසැල් වෙත දැඩි ලෙස අවවාද කළ අතර ආපනශාලා හිමියන් වෙත උපදෙස් ලබා දුන්නේ, කෑම සකස් කිරීම සඳහා කැඩී බිඳි ගිය නුසුදුසු ප්ලාස්ටික් භාජන ඉවත් කරන ලෙසයි.
තවද අපිරිසිදු ලෙස ආහාර පිසින ලද ආපන ශාලා සියල්ලටම නඩු පැවරීමටද අදාළ නිලධාරීන් පියවර ගනු ලැබුවා.
