රුසියානු ජනාධිපති ව්ලැඩ්මීර් පුටින් ඇමරිකා එක්සත් ජනපදයට සහ යුරෝපා රටවලට එරෙහිව තර්ජනාත්මක අනතුරු ඇඟවීමක් නිකුත් කර තිබෙනවා.
වාර්ෂික වශයෙන් රුසියානු ජනතාව අමතමින් සිදු කරන ලද කතාවක් අතරතුර රුසියානු ජනපති පුටින් විසින් මෙම අනතුරු ඇඟවීම නිකුත් කර තිබුණා.
ව්ලැඩ්මීර් පුටින් මෙහිදී අවධාරණය කර ඇත්තේ නේටෝ රටවල් සිය හමුදා යුක්‍රේනය වෙත යැවීමට කටයුතු කළහොත් එය න්‍යෂ්ටික යුද්ධයක් ඇති කිරීමේ අවදානමක් මතු කරනු බවයි.
බටහිර ඉලක්ක වෙත පහර දීමට රුසියාව සතුව ආයුධ සහ ශක්තිය පවතින බවද රුසියානු ජනපති මෙහිදී පවසා තිබෙනවා.
ප්‍රංශ ජනපති එමානුවෙල් මැක්‍රොන් මෙම සතිය ආරම්භයේදී යුරෝපීය හමුදා කණ්ඩායම් යුක්‍රේනය වෙත යැවීමට අවශ්‍ය පසුබිම මේ වන විට සකසා ඇති බවට නිකුත් කළ ප්‍රකාශයට පිළිතුරක් වශයෙන් මෙම අනතුරු ඇඟවීම නිකුත් කර ඇති බවයි විදෙස් මාධ්‍ය පෙන්වා දෙන්නේ.
යුක්‍රේනයට සිය හමුදාව යැවීම සඳහා පියවර ගන්නා රටවලට ඉදිරියේදී ඛේදජනක ඉරණමකට මුහුණ දීමට සිදුවනු ඇති බවද පුටින් මෙහිදී ප්‍රකාශ කර තිබෙනවා.
