ශාන්තිකර්මයක් අතරතුරදී රෝගාතුර වූ කාන්තාවක් රෝහල් ගත කිරීමෙන් පසු මිය ගොස් තිබෙනවා.
ලග්ගල, දාස්ගිරිය, හත්තොටඅමුණ ප්‍රදේශයෙන් මෙම සිද්ධිය වාර්තා වනවා.
පොලීසිය කියා සිටියේ පෙරේදා (16) සවස් කාලයේ සිට ඊයේ (17) උදෑසන දක්වා මෙම ශාන්තිකර්මය සිදුකර ඇති බවයි.
මෙලෙස මියගොස් ඇත්තේ 48 හැවිරිදි ගල්කිරියාගම ප්‍රදේශයේ පදිංචි කාන්තාවකි.
පසුගියදා ලග්ගල, දාස්ගිරිය ප්‍රදේශයේ නිවසක අසනීප තත්ත්වයෙන් පසුවූ කාන්තාවන් දෙදෙනෙකු හා පිරිමි පුද්ගලයෙකු සුවපත් කිරීම සඳහා ශාන්තිකර්මයක් පවත්වා තිබුණා.
ඒ අතරතුර ශාන්තිකර්මය සිදුකළ තැනැත්තා විසින් වරින් වර මොවුන් තිදෙනාට තැඹිලි ගෙඩි 21ක බැඟින් පොවා තිබෙනවා.
එසේ සිදුකරන අතරවාරයේ දී මෙම කාන්තාව හදිසි අසනීප තත්ත්වයට පත්වූ පසු කහ දියරද බීමට සලස්වා ඇති බව වාර්තා වනවා.
ඉන්පසු රෝගී තත්ත්වය උත්සන්න වීම හේතුවෙන් මෙම කාන්තාව දාස්ගිරිය රෝහල් වෙත ඇතුළත් කර වැඩිදුර ප්‍රතිකාර සඳහා දඹුල්ල රෝහල වෙත ඇතුළු කිරීමෙන් පසුව ඊයේ (17) මියගොස් තිබෙනවා.
දේහය පිළිබඳව පශ්චාත් මරණ පරීක්ෂණය අද (18) දඹුල්ල රෝහලේ දී සිදු කිරීමට නියමිතයි.
ශාන්ති කර්මය සිදුකරන ලද 25 හැවිරිදි පුද්ගලයා පොලීසිය විසින් මේ වන විට අත්අඩංගුවට ගෙන තිබෙනවා.
ලග්ගල පොලීසිය සිද්ධිය සම්බන්ධයෙන් වැඩිදුර පරීක්ෂණ සිදු කරනු ලබනවා.
