මේ වනවිට රට මුහුණ දී සිටින දැවැන්ත විදුලි අර්බුදයෙන් මිදීම සදහා රාජ්‍ය මෙන්ම විදුලි බිල් නොගෙවන ලද පෞද්ගලික අංශයේ ඉඩම්, නිවාස ඇතුළු දේපල විකිණීමට ඇෆ්ගනිස්තායේ තලේබාන් පාලනය තීරණය කර තිබේ.
ඇෆ්ගනිස්තානයේ විදුලි සැපයුමෙන් සියයට අසූවක් පමණ සපයා ගන්නේ අසල්වැසි මධ්‍යම ආසියානු රටවල් වන තජිකිස්තානය, උස්බෙකිස්තානය සහ තුර්ක්මේනිස්තානය යන රටවලිනි.
ලබාගත් විදුලිය වෙනුවෙන් ඇෆ්ගනිස්තානය එම රටවල් වෙත ඇමරිකානු ඩොලර් මිලියන 62 ක පමණ මුදලක් ගෙවීමට නියමිතව තිබේ.
අදාළ ණය නොගෙවුවහොත් ඇෆ්ගනිස්තානය වෙත විදුලිය සැපයුම අත්හිටුවන බවට එම රටවල් අනතුරු අඟවා ඇත.
මේ හේතුවෙන් කාබුල් අගනුවර ඇතුළු ඇෆ්ගනිස්තානයේ විදුලි සැපයුම බිදවැටීමේ අනතුරක් මතුව ඇති අතර මේ තත්වය වළක්වා ගැනීම සදහා හදිසි ණය සහ ආධාර ලබාදෙන්නැයි තලේබාන් පාලනය එක්සත් ජාතීන්ගේ සංවිධානයෙන් ද ඉල්ලීමක් කර තිබිණ.
එහෙත් එම ඉල්ලීමට ද සාර්ථක ප්‍රතිචාර නොලැබීම හේතුවෙන් අදාළ දේපළ විකුණා එම ණය ගෙවීමට ඇෆ්ගනිස්තානයේ තලේබාන් පාලනය තීරණය කර ඇති බව එරට වාර්තා සදහන් කරයි.
