මහරගම අපේක්ෂා රෝහලේ නව ළමා වාට්ටු සංකීර්ණය විවෘත කිරීමේ උත්සවයේදී සෞඛ්‍ය අමාත්‍ය නලින්ද ජයතිස්ස සිදුකළ ප්‍රකාශයේ කිසිදු ගැටලුවක් නොමැති බව කතරගම දේවාලයේ බස්නායක නිළමේ ඩිෂාන් ගුණසේකර මහතා පවසනවා.
ඔහු සඳහන් කළේ ඇතැම් මාධ්‍ය මගින් හුවාදක්වන පරිදි අමාත්‍යවරයා තමාට හෝ කතරගම දේවාලයට අපහාසයක් සිදුකළේ යැයි තමා කිසිසේත් විශ්වාස නොකරන බවයි.
රජයේ කා‍ර්යන් විධිමත් ක්‍රමවේදයක් යටතේ සිදුකළ යුතුය යන්න එම අවස්ථාවේදී අමාත්‍යවරයා අදහස් කළ බව බස්නායක නිලමේවරයා වැඩිදුරටත් අවධාරණය කර සිටියා.
ඉදිරියේදී දේශපාලන උවමනාව මත හෝ කිසියම් අයෙකුට ඇති වන සංවේදී සිතුවිල්ලක් පමණක් සලකා බලා රජයේ සංවර්ධන කටයුතු සඳහා දායක විය නොහැකි බවත් එලෙස සිදුකරන පරිත්‍යාග ආදිය ජාතික සැලැස්මක් අනුව සිදු කළ යුතු බවත් අමාත්‍ය නලින්ද ජයතිස්ස මහතා පසුගියදා ප්‍රකාශ කළා.
ශ්‍රී ලංකා ගුවන් හමුදා ශ්‍රම දායකත්වයෙන් හා රුහුණු කතරගම මහා දේවාලයේ මුල්‍ය අනුග්‍රාහකත්වයෙන් පිළිකා රෝගි දරුවන් වෙනුවෙන් මහරගම අපේක්ෂා රෝහලේ ඇටමිදුළු හා රුධිර ජනන සෛල බද්ද කිරීමේ ඒකකය විවෘත කිරීමේ අවස්ථාවට එක්වෙමින් අමාත්‍යවරයා මේ බව ප්‍රකාශ කළා.
මෙම ප්‍රකාශයට ඇතැම් පාර්ශවවල විරෝධය එල්ල වූ අතර සමාජ මාධ්‍ය තුළද එය දැඩි ලෙස කතාබහට ලක්වුණා.
