හොරණ පොකුණුවිට නගරයේ දි පදික මාරුව මතින් ගමන් ගත් කාන්තාවක් යුද හමුදා කොප්‍රල්වරයකු පැදවූ මෝටර් රථයක ගැටීමෙන් බරපතල තුවාල ලබා රෝහල් ගත කළ බව හොරණ මූලස්ථාන පොලිසිය පවසනවා.
අනතුරින් බරපතල තුවාල ලැබුවේ හල්තොට ලෙනවර ප්‍රදේශයේ පදිංචි 61 හැවිරිදි කාන්තාවක්.
තුවාල ලද කාන්තාව වෛද්‍යවරියකගේ නිවසේ ගෘහ සේවිකාවක් වශයෙන් සේවය කරන අතර ඇය පොකුණු විට නගරයේදී පදික මාරුව මතින් පාර මාරුවීමේදී බණ්ඩාරගම දෙස සිට හොරණ දෙසට ගමන් ගත් මෝටර් රථයක ගැටී අඩි 12 ක් පමණ ඈතට විසි වී මාර්ගයේ වැටී ඇතැයි පොලිසිය පවසනවා.
බරපතළ තුවාල ලද කාන්තාව හොරණ මූලික රෝහල වෙත ඇතුළත් කිරීමෙන් අනතුරුව වැඩිදුර ප්‍රතිකාර සඳහා කොළඹ ජාතික රෝහල වෙත ඇතුළත් කර තිබෙනවා.
අපරීක්ෂාකාරී රිය ධාවනය සම්බන්ධයෙන් අත්අඩංගුවට ගත් හොරණ බැල්ලපිටිය ප්‍රදේශයේ පදිංචි සැකකාර යුද්ධ හමුදා කෝප්‍රල්වරයා හොරණ මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව මෙම මස 23 වෙනිදින දක්වා රිමාන්ඩ් භාරයට පත් කළා.
