මේ දිනවල සමාජ මාධ්‍ය ඔස්සේ සංසරණය වන ත්‍රිකුණාමලයේදී තරුණයින් පිරිසක් විසින් නිල ඇඳුමින් සැරසී සිටින පොලිස් නිලධාරීන් දෙදෙනෙකුට පහර දෙන ආකාරය දැක්වෙන වීඩියෝව සම්බන්ධයෙන් පොලිස් මාධ්‍ය ප්‍රකාශකවරයා නිවේදනයක් නිකුත් කර තිබෙනවා.
ඔහු සඳහන් කළේ ඊයේ (31) දින නිලාවේලි ප්‍රදේශයේ රථ වාහන වරදක් සම්බන්ධයෙන් නීතිය ක්‍රියාත්මක කිරීමට ගිය පොලිස් නිලධාරීන් දෙදෙනෙකුට සිය රාජකාරි කිරීමට ඉඩ නොදී 10 දෙනෙකුගෙන් සමන්විත පිරිසක් විසින් පහර දී ඇති බවයි.
මේ වන විට මෙම සිදුවීමට සම්බන්ධ ප්‍රධාන සැකකරුවෙකු අත්අඩංගුවට ගෙන අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගත කර තිබෙනවා.
පොලිස් මාධ්‍ය ප්‍රකාශකවරයා සඳහන් කළේ අනෙකුත් සැකකරුවන් ප්‍රදේශය හැර පළා ගොස් සිටින නමුත් අත් අඩංගුවට ගෙන අධිකරණය හමුවට ඉදිරිපත් කර නීතිය ක්‍රියාත්මක කරන බවයි.
පොලිස් නිලධාරීන්ගේ නීත්‍යානුකූල රාජකාරියට බාධා කිරීම දණ්ඩ නීති සංග්‍රහය යටතේ බරපතළ සිර දඬුවම් හිමි වන වරදක් බවත්, ඉදිරියේදී කිසිවෙකු හෝ මෙවැනි බලපෑම් සිදු කල හොස් ඔවුන්ට එරෙහිව නීතිය ක්‍රියාත්මක කරන බවත් මාධ්‍ය ප්‍රකාශකවරයා අවධාරණය කළා.
